Афсонавий Pong ўйини мини-форматда қайта тақдим этилди

Американинг Atari компанияси 1970 йилларда бутун ўйин саноатига туртки бўлган Pong ўйинини қайта тақдим этди. Мini Pong номини олган ўйин афсонавий ўйиннинг ихчам варианти ҳисобланади, деб ёзади Portaltele.

Авваллари ўйин версияси секин-аста аркад автоматлардан уй консолларига ўтган бўлса, эндиликда бу бошқарув учун иккита регуляторга эга 8 дюймли планшетга айланди. Унда бошқа ҳеч қандай қўшимча ўйин ёки функциялар йўқ, фақатгина овоз баландлигини бошқариш мумкин.

Мini Pong учта АА-батареялари ёрдамида ишлайди. Ўйинни икки киши ёки ботга қарши ўйнаш мумкин — унинг 10 та мураккаблик даражаси бор.

Компания консолнинг ишга туширилишига оид батафсил маълумотларни ошкор қилмаган — савдолар бошланиши ва унинг нархи тўғрисида кейинроқ маълумот берилиши айтилмоқда.

Pong — энг биринчи аркад видеоўйинларидан бири ҳисобланади. Бу икки ўлчамли оддий графикадан фойдаланган ҳолда ўйналадиган теннис спорт ўйини бўлиб, у 1972 йилда Atari фирмаси томонидан тақдим этилган. Pong тижорий видеоўйинлар орасидаги муваффақиятга эришган биринчи ўйин ҳисобланади.