Польша, Хорватия ва Словенияда COVID-19 билан касалланиш бўйича антирекордлар янгиланди

Польша, Хорватия ва Словенияда 21 октябрь куни Соғлиқни сақлаш вазирликлари COVID-19 коронавирус инфекцияси билан касалланиш ҳолатлари бўйича суткалик кўрсаткичлар ёмонлашгани, антирекордлар янгиланганини хабар қилди, деб ёзмоқда «Korrespondent.net».

Польшада охирги бир суткада 10 040 та янги касалланиш ҳолати қайд этилди ва бу эса янги антирекорд ҳисобланади. Касаллик асоратлари оқибатида бир сутка давомида 130 нафар бемор вафот этган.

Польшада пандемия бошланганидан буён коронавирус инфекциясини юқтириб олганлар сони 202 579 нафарга етган. 3851 киши касаллик асоратлари оқибатида ҳаётдан кўз юмган. 100 минг нафарга яқин бемор инфекциядан тузалган.

Мамлакат касалхоналарида 9439 нафар бемор коронавирус инфекциясидан даволанмоқда, шундан 757 нафари ўпкага сунъий ҳаво етказиб берувчи махсус аппаратларга уланган.

Словенияда эса охирги бир сутка ичида янги антирекорд ўрнатилди – 1503 та янги касалланиш ҳолати аниқланди. Фаол ҳолатлар сони (коронавирусдан даволанишда давом этаётган беморлар) эса 8860 тани ташкил қилмоқда. Шундан 333 нафар бемор касалхоналар, 55 нафари жонлантириш бўлимларида даволанмоқда. Саккиз нафар бемор охирги бир сутка ичида COVID-19 коронавирус инфекциясининг асоратлари оқибатида вафот этган, мамлакат бўйича касаллик асоратлари оқибатида қайд этилган ўлимлар сони 200 тадан ошиб кетган.

Хорватияда 1424 та янги касалланиш ҳолатлари кузатилди. Бу пандемия бошидан бери мамлакатда кузатилган янги антирекорд.

Хорватияда касаллик қайд этилган фуқаролар сони 6459 нафарни ташкил қилмоқда. Шундан 622 нафари касалхоналарда, 38 нафари эса ўпкага сунъий тарзда ҳаво етказиб берувчи аппаратларга уланган. Бир сутка ичида жами 11 киши касаллик асоратлари оқибатида ҳаётдан кўз юмган.

Эслатиб ўтамиз, аввал Болгарияда COVID-19 бўйича вазият оғирлашгани туфайли фуқароларнинг кўчада тиббий ниқоб таққан ҳолда юриши мажбурий этиб белгиланганди. Шунингдек, Словенияда ҳукумат мамлакат миқёсида эпидемия бошланганини эълон қилгани,  ҳудудлар бўйлаб ҳаракатланиш чеклангани ва тунги вақтларда комендантлик соати жорий этилгани ҳақида хабар берилганди.