Халқ депутатлари Андижон вилоят кенгашининг навбатдаги сессиясида вилоят ҳокими Шуҳрат Абдураҳмонов уч миллиондан ортиқ аҳолини озиқ-овқат маҳсулотлари билан таъминлаш учун амалга оширилаётган ишлар ҳақида маълумот берди, дея хабар берди «Дарё» мухбири.
Маълум қилинишича, уч миллиондан ортиқ аҳолини тиббий меъёрларда белгиланган, хавфсиз ва етарли озиқ-овқат маҳсулоти билан таъминлаш учун барча чоралар кўрилмоқда. Вилоятда жорий йилда жами 1 миллион 111 минг тонна озиқ-овқат маҳсулотларини етиштириш белгиланган бўлиб, шу кунга қадар 965 минг тонна сабзавот ва гўшт маҳсулотлари захирага олинган.
«Президентимиз раҳбарлигида 2020 йил 16 октябрь куни ўтказилган видеоселектор йиғилишидан сўнг келгуси олти ойлик учун киши бошига ҳисобланган озиқ-овқат маҳсулотлари захирасини яратиш ишларини бошлаб юбордик. Шунингдек, келиб чиқиши мумкин бўлган муаммоларнинг олдини олиш мақсадида бозорда энг кўп талаб қилинадиган сабзавотлар аниқланган. Аҳоли сонидан келиб чиқиб айтадиган бўлсак, олти ой учун 76,1 минг тонна картошка захирасини яратишимиз керак. Ушбу эҳтиёжнинг 66,6 минг тоннасини (яъни, 87,5 фоиз) вилоятимизда етиштирилган маҳсулотлар ҳисобидан қопланса, қолган 9,5 минг тоннасини (яъни, 12,5 фоиз) четдан олиб келишни мўлжаллаяпмиз. Шундан уч минг тоннасини вилоят ҳокими захира жамғармаси, 1,2 минг тоннасини бюджет ташкилотлари, қолган 5,3 минг тоннасини эса вилоятдаги тадбиркорлар маблағлари ҳисобига қўшни, Қирғизистон, Қозоғистон, Россия ва Белоруссия мамлакатларидан олиб келинади. Картошка олиб келишни истаган 27 та тадбиркорга тижорат банклари томонидан 35 миллиард сўм миқдорида кредит маблағлари ажратилган», — дейди вилоят ҳокими.
Аниқланишича, вилоятда гўштнинг олти ойлик захирани яратиш учун 43,9 минг тонна гўшт талаб этилади. Эҳтиёжнинг 42 минг тоннаси маҳаллий ва 1,9 минг тоннаси импорт маҳсулотлар ҳисобидан қопланади.
«Бунинг учун бир ой ичида вилоятдаги саккиз нафар тадбиркор томонидан қўшни давлатлардан тирик ҳолда чора ҳайвонлари олиб кирилади. Тадбиркорларга тижорат банклари томонидан 26 миллиард сўм кредит маблағлари ажратилади», — деган вилоят ҳокими.
Ҳокимнинг айтишича, вилоятда тухум, балиқ, гуруч, парранда гўшти, пиёз ва сабзи маҳсулотлари захираси етарли, ҳаттоки уларни экспортга чиқариш имконияти ҳам мавжуд.
Эслатиб ўтамиз, Шавкат Мирзиёев раислигида 16 октябрь куни озиқ-овқат хавфсизлигини таъминлаш ва ички бозорда нарх-наво барқарорлигини сақлаш чора-тадбирлари юзасидан видеоселектор йиғилиши ўтказилди. Унда гўшт, тухум, ўсимлик ёғи ва шакар нархининг кескин ўсиши аҳолининг норозилигига сабаб бўлаётгани таъкидланди. Президент барча озиқ-овқат маҳсулотларининг захираси бўлиши кераклигини, бу давлат сиёсатига айланиши лозимлигини таъкидлаб, ҳокимлар ҳамда секторлар раҳбарлари ўз ҳудудида яратилган тизим, бозордаги шарт-шароитлар ва нарх-наво бўйича халқ депутатлари маҳаллий Кенгаш сессияларида халққа ҳисобот бериши зарурлигини айтганди.
Изоҳ (0)