Хоразмда ноқонуний ов қилган ҳоким ўринбосари ва ИИБ ходими ушлангани тўғрисида хабар берилганди. Тупроққалъа тумани ҳокимлиги ахборот хизматининг маълум қилишича, ноқонуний ов қилган ҳоким ўринбосари Шуҳрат Шомуродов 19 октябрь куни ўз аризасига биноан вазифасидан озод этилган.
16 октябрь куни тунги соат 02:00 ларда 9203-ҳарбий қисм чегара ходимлари билан вилоят Экология ва атроф-муҳитни муҳофаза қилиш бошқармаси ходимлари томонидан ўтказилган экологик назорат тадбири давомида Хоразм вилоятининг Туркманистон билан чегарадош Тупроққалъа тумани, «Тупроққалъа» маҳалласи чегараолди ҳудудида 4 нафар фуқаро чегараолди ҳудудларида бўлиш режимини ҳамда ов қилиш ва балиқ овлаш қоидаларини бузиб, ноқонуний ов қилгани аниқланган.
Таъкидланишича, шу вақтда «Тупроққалъа» маҳалласидаги экин майдонларида, шоли ҳосили йиғим теримини назорат қилиб юрган Тупроққалъа туман ҳокимининг қишлоқ хўжалиги бўйича ўринбосари Шуҳрат Шомуродов ва ИИБ ходими чегара ходимлари ов қилиб юрган фуқароларни ушлаб турганлигини кўриб, чегара ходимларига ёрдам бериш мақсадида уларга яқин борган. Шунда 9203-сонли ҳарбий қисм чегара ходимлари уларни ҳам чегара постига олиб бориб, уларга нисбатан чегара зонасига кириш қоидасини бузганликлари ҳақида маъмурий баённома тузилиб суд жараёнига тегишли ҳужжатлар билан тақдим қилинган.
Тупроққалъа туман ҳокимининг қишлоқ ва сув хўжалиги бўйича ўринбосари 19 октябрдан биноан ўз аризасига кўра эгаллаб турган лавозимидан озод этилган.
«Қўшимча маълумотлар тўпланган ҳужжатлар асосидаги суднинг қонуний кучга кирган қароридан кейин маълум қилиниши кутилмоқда», — дейилади хабарда.
Аввалроқ Бухорода ноқонуний тарзда ўрдак овлаган шахслар жаримага тортилгани тўғрисида хабар берилганди.
Изоҳ (0)