Танзила Норбоева: «Деярли ҳар куни бюджет маблағларининг ноўрин сарфланиши билан боғлиқ масалалар кўтарилмоқда»

Сенатнинг саккизинчи ялпи мажлисида Сенат раиси Танзила Норбоева бюджет маблағларининг ноўрин сарфланиши билан боғлиқ масалалар кўтарилаётганига тўхталиб ўтди.

«Деярли ҳар куни халқимиз томонидан бюджет маблағларининг ноўрин сарфланиши билан боғлиқ масалалар кўтарилмоқда. Афсуски, халқимиз, яъни солиқ тўловчилар ҳар доим ҳам бундай саволларга асосли жавоб ололмаяпти. Холис муносабат ҳам билдирилмаяпти бу бўйича»,—дейди Норбоева.

Сенат раиси сенат Ҳисоб палатаси билан биргаликда бюджет маблағларидан самарали фойдаланиш борасидаги ишларни Тошкент вилояти мисолида комплекс ўрганиб чиқилгани, унда жуда кўплаб тизимли муаммолар аниқланганини билдирган. Мутасаддиларда бюджетга қўшимча манбалар аниқлаш борасида ташаббускорлик, изланиш йўқлигини алоҳида қайд этганини таъкидлади.

Айрим ҳолларда уларга молиявий саводхонлик етишмаслигининг ҳам гувоҳи бўлдик. Муҳим кўрсаткичларни қўшиб ёзиш ҳолатларига ҳам тўла барҳам берилмаган. Шу боис ҳозирданоқ мазкур йўналишдаги ишларимизни танқидий кўриб чиқишимиз, бюджет назоратини янада кучайтиришимиз лозим бўлади. Сенатнинг Бюджет ва иқтисодий ислоҳотлар масалалари қўмитаси ҳамда бошқармаси бундай таҳлиллар кўламини янада кенгайтириши тизимли муаммолар ечими юзасидан асосли таклифлар ишлаб чиқиши лозим.

Танзила Норбоева, Сенат раиси 

Эслатиб ўтамиз, аввалроқ Сенат раиси Тошкент вилояти ҳокимлигида бўлиб ўтган Сенат кенгашининг сайёр мажлисида Қумқўрғонда 6,5 миллиард сўмга қурилган, бироқ орадан кўп ўтмай қулаб тушган кўприк масаласига тўхталиб, «Нима сабабдан қурилиш соҳасида кўплаб қонун бузилиши содир бўлса ҳам уларнинг сабаблари, уларга яратилаётган «шароитлар» чуқур ўрганилмаяпти. Қачонгача бюджет маблағлари, халқ ризқи талон-торож қилинади?!», — дея эътироз билдирган эди. Ўша мажлисда, шунингдек, Тошкент вилояти бир қанча соҳаларда қилинаётган ишлари оқсаётгани, айрим тизимли хато ва камчиликларга йўл қўйилганлиги танқид қилинган.