Ижтимоий тармоқлар ва Telegram’даги оммабоп каналларда 21 октябрь куни Enter Engineering компаниясининг Қашқадарё вилояти Ғузор туманидаги объектларидан биридаги ишчиларнинг норозилиги акс этган видеоёзувлар тарқалди. Видеода норози ишчилар тартибсизликлар келтириб чиқариб, компания мол-мулкига зарар етказганини кўриш мумкин.
«Ҳақиқатан ҳам 21 октябрь куни тонгда ишчилар учун мўлжалланган ошхонанинг моноблок ускунаси (электрон ўтказиш тизими)да техник носозликлар юзага келгани боис улар ўз вақтида нонуштага кира олмаган. Бу эса ишчиларнинг оммавий норозилиги ва тартибсизлик ҳаракатларига сабаб бўлган», — дейилади Enter Engineering компанияси матбуот хизмати ахборотида.
Энергетика вазирлигидан маълум қилишларича, 7:30 да бошланган ишчиларнинг норозилиги бош пудратчилар (Enter Engineering, Hyundai Engineering), шунингдек, буюртмачи (Uzbekistan GTL) офис биноларининг дераза ойналари, офис жиҳозларини синдириш, шунингдек, бошқа вақтинчалик бино ва иншоотлар (ошхона, омборлар, назорат пунктлари ва бошқалар) бузилишига олиб келган.
Соат 9:00 га келиб қурилиш майдонида вазият барқарорлашган, оммавий тартибсизлик тўхтатилган. Ҳозирда Uzbekistan GTL мутахассислари томонидан қурилиш майдончасидаги бузилишлар ва келтирилган зарарлар миқдори текширилиб, тизимдаги носозликларни бартараф этиш ишлари олиб борилмоқда, ишчи гуруҳи моноблок тизимидаги носозликни тузатмоқда.
«Айни пайтда ‘Ўзбекнефтгаз’ вакиллари ва Enter Engineering раҳбарияти тафсилотларни билиш ва келажакда шунга ўхшаш ҳодисаларнинг олдини олиш учун воқеа жойига етиб борди», — дейилади вазирлик ахборотида.
«Таъкидлаш жоиз, объектда иш ҳақини тўлаш билан боғлиқ муаммолар юзага келмаган — тўловлар ўз вақтида амалга ошириб келинмоқда. Бундан ташқари, Enter Engineering компанияси томонидан ишчиларнинг қулай турмуши ва меҳнат фаолиятини олиб бориши учун зарур барча шароитлар яратилган», — дея қўшимча қилинган компания баёнотида.
Ўзбекистон Бош прокуратурасидан маълум қилишларича, мазкур ҳодиса Қашқадарё вилояти прокуратураси ходимлари томонидан жойида ўрганилмоқда.
Изоҳ (0)