2020 йилнинг ўтган даврида 11 нафар ички ишлар ходимлари қийноққа солиш билан боғлиқ жиноятлар учун айбланиб судга берилди. Бу ҳақда Бош прокурорнинг биринчи ўринбосари Абдуҳалим Холмахматов Сенатнинг саккизинчи ялпи мажлисида маълум қилган.
2020 йилнинг 9 ойида прокуратура органларига ҳуқуқ-тартибот идоралари ходимларининг ноқонуний хатти-ҳаракатлари ҳақида жами 2 323 та ариза ва хабарлар келиб тушган. Шундан, 242 таси (10,4%) қийнаш, қўрқитиш ва бошқа тазйиқлар қилинганлиги ҳақидаги мурожаатларни ташкил қилган.Прокуратура органлари томонидан 2020 йилнинг 7 ойида ҳуқуқни муҳофаза қилувчи органларда 5 116 та текшириш ўтказилиб, аниқланган қонун бузилиши ҳолатларини бартараф этиш юзасидан 2 783 та тақдимнома киритилгани билдирилди.Таҳлиллар шуни кўрсатмоқдаки, қийноқ, асосан, ички ишлар органлари фаолиятида ҳамда терговга қадар текширув ва тергов даврида учрамоқда. Шу йилнинг ўтган даврида 11 нафар ички ишлар ходимлари томонидан қийноққа солиш билан боғлиқ жиноятлар учун айбланиб судга берилди.
Абдуҳалим Холмахматов, бош прокурорнинг биринчи ўринбосари
Бош прокурор ўринбосари, шунингдек, ИИВ билан тезкор-қидирув ва тергов жараёнида фуқароларнинг ҳуқуқлари, эркинликлари ва қонуний манфаатлари таъминланишини кучайтиришга қаратилган чора-тадбирлар дастури ишлаб чиқилганини қайд этган.
Бош прокуратура, Олий суд, Давлат хавфсизлик хизмати, Ички ишлар вазирлиги, Давлат божхона қўмитаси ҳамда Миллий гвардиянинг қўшма қарори қабул қилиниб, шахснинг ҳуқуқини чеклайдиган процессуал мажбурлов чораларини (ушлаб туриш, қамоққа олиш, уй қамоғи, лавозимдан четлаштириш) қўллаш ҳолатларини ягона электрон ҳисобга олиш тизимига киритиб боришнинг мажбурийлиги белгилангани билдирилди. Ўрнатилган тартибга асосан, шахсга қўлланилган ушлаб туриш чораси тизимга киритилмаган тақдирда тергов ҳибсхонаси ёки вақтинча ушлаб туриш ҳибсхонасига қабул қилинишига йўл қўйилмайди. Шу каби, жиноятга оид ариза, хабар ва бошқа маълумотларни ягона электрон ҳисобини юритиш имконини берувчи дастур яратилиб, барча идораларга жорий қилиш чоралари кўрилаётгани, масала якунланиш арафасида эканлиги айтилди.
Холмахматов Сенатга қийноқларга қарши курашиш билан боғлиқ чоралар самарадорлигини ошириш мақсадида Жиноят кодексининг 235-моддасини (Қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) мавжуд жазо санкциясини яна-да кучайтириш нуқтаи назаридан такомиллаштириш, бу жиноят учун озодликни чеклаш жазосини чиқариб ташлаш, қийноқни қўллаш билан боғлиқ жиноятлар учун амнистия қўллашни тақиқлаш, жавобгарликка ва жазога тортиш муддатлари ўтиб кетганлиги билан боғлиқ нормаларни қийноққа солиш жиноятини содир этган шахсларга нисбатан қўлламаслик билан боғлиқ таклифларни кўриб чиқиш мақсадга мувофиқ бўлишини маълум қилган.
Изоҳ (0)