Украинада бир кеча-кундузда касалланганлар сони 9,5 минг кишидан ошса, қатъий чекловлар жорий қилинади. Бу ҳақда президент Владимир Зеленский мамлакат диний етакчилари билан учрашувда айтиб ўтди, деб ёзади «РБК».
«Бир кеча-кундузда 9,5 мингдан кўпроқ касалланганлар бўлса, қатъий карантин жорий қилишга мажбур бўламиз. Бироқ унда мамлакатимиз иқтисодиёти тўхтаб қолади ва ҳаммага жуда қийин бўлади», — деди давлат раҳбари.
Зеленский аниқлик киритишича, 9,5 минг кўрсаткичи Украина соғлиқни сақлаш тизими учун мушкул вазиятдир, чунки давлат доимий равишда койкалар сонини ошира олмайди ва барча тиббиёт муассасаларини COVID-19 беморларини қабул қилишга мослаштира олмайди.
Президент сўзларига кўра, айни пайтда баъзи ҳудудларда касалхоналар аллақачон 70 фоизгача банд бўлган, қатор аҳоли пунктларидаги клиникаларда эса бўш жойлар қолмаган.
Зеленский Украинада айни пайтда бир кеча-кундузда 5-6 минг кишида касаллик аниқланаётгани ва ушбу кўрсаткич ўсишига мойиллик борлигини айтди. У дин вакилларини диний тадбирларни фуқароларнинг оммавий тўпланишига йўл қўймаган ҳолда, масалан, ибодатларни онлайн-режимга ўтказган ҳолда олиб боришга чақирди.
Эслатиб ўтамиз, Украинада 17 октябрь куни 6410 нафар кишида коронавирус аниқланиб, кунлик янги антирекорд қайд этилган эди.
19 октябрь ҳолатига эса мамлакатда 4766 та касалланиш ҳолати аниқланди, уларнинг умумий сони эса 303 минг нафардан ошди. Пандемия бошидан буён коронавирус инфекциясидан Украинада 5673 киши вафот этган.
Дунё бўйича коронавирусга чалинганлар сони 40 миллион кишидан ошди. Касалланганлар сони бўйича биринчи ўринни АҚШ (8,1 миллион киши), ундан кейинги ўринларни Ҳиндистон (7,5 миллион киши) ва Бразилия (5,2 миллион киши) эгаллаган. Тўртинчи ўринда Россия бўлиб, 1,4 миллион киши COVID-19’га чалингани қайд этилган.
Изоҳ (0)