Қанчалик ишониш қийин бўлмасин атрофдаги буюм ва жиҳозлар ҳам кишининг эрта қаришига сабаб бўлади. Чунки ноқулай каравот, ғичирлайдиган стул ва қоронғи хонада вақтни ўтказиш асаблар бузилиши ва юзда ажин пайдо бўлишига олиб келади.
Ёруғликнинг етарли эмаслиги
Уйда ёруғликнинг қайси бурчакдан тушаётгани ҳам муҳим рол ўйнайди. Ёруғлик кўз учун қулай бўлиши керак йўқса, киши кўзини қисиб қарашга ўрганиб қолади бу эса ажин тушишига сабабчи бўлади. Бундан ташқари қоронғи ва ёруғлик етарли бўлмаган хонада ишлаш ёки ўқиш кўриш қобилиятининг сусайишига олиб келади.
Чойшабларнинг нотўғри танланиши
Қанчалик ғалати туюлмасин, чойшабларнинг ҳам аҳамияти бор. Бежизга Ким Кардашян, Синди Кроуфорд ва Женнифер Энситонлар фақатгина ипак матоли чойшабни афзал билишмайди. Мутахассисларнинг таъкидлашига қараганда, ипак матоли чойшаб тери ёшлигини сақлашга ёрдам беради. Бундан ташқари, ипак уйқуга ётишдан аввал юз ва тана терисига суртилган зардоб ҳамда кремларни шимиб олмайди. Пахтали чойшаб эса аксинча. Юзда турли ҳуснбузарлар тошишининг олдини олиш ва гигиенага амал қилган ҳолда чойшаб қандай матодан тикилган бўлишидан қатъи назар, кунора алмаштириб туриш керак.
Намлик етишмаслиги
Уйдаги об-ҳавонинг қандай эканлигининг ҳам аҳамияти бор. Агар турар жойингиздаги намлик даражаси 60 фоиздан кам бўлса, тери намлик етишмагани сабаб тезроқ қарийди. Қуруқ ҳавода вирус ва инфекциялар тезроқ тарқайди, касалликлар эса ёшликка таъсир қилмай қолмайди. Шу сабабдан уй ва хонадонларда ҳавонинг намлигига эътибор бериш тавсия қилинади.
Кимёвий тозалаш воситалари
Идиш ювиш давомида, ювиниш хонаси ва ошхона печларини тозалаш учун фойдаланадиган воситаларни қўлқопсиз ишлатиш қўл терисига таъсир кўрсатмай қолмайди. Ушбу воситалар таркибидаги кимёвий моддалар нафақат ёшлик, балки саломатликка ҳам зарар етказиши мумкин.
Ноқулай стол ва стул
Юзнинг ёш ёки қари кўриниши ҳам қадди-қоматни тик тутиш ёки тутмаслик билан боғлиқ бўлади. Букчайиш ва эгилиб ўтирган ҳолда иш бажариш қоматга ва қиёфага таъсир кўрсатади. Шу сабаб ишлаш ёки ўқиш давомида мебелнинг қулайлиги, ёруғлик етарли эканига эътибор қаратиш ҳамда вақти-вақти билан жисмоний машқлар бажариб туриш керак.
Букиладиган ва ёзиладиган диван
Бундай диван яхши, аммо ухлаш учун эмас. Уйқуга яхши тўшаги бор каравотда ётиш керак. Уйқунинг яхши бўлмаслиги вақтидан аввал қаришнинг энг асосий сабабларидан бири бўлади. Кўз атрофида чарчоқнинг акс этиши, майда ажинлар ва иштаҳанинг керагидан ортиқ очилишига сабаб бўладиган асаб гормони кортизолнинг кўпайиши, уйқу гормони мелатониннинг кам эканлиги сизни ёш кўрсатмаслиги аниқ.
Ноқулай уй жиҳозлари
Уйдаги тартибсизлик одам кўринишида ҳам акс этади. Кўнгил тўлмаслиги оқибатида лабнинг ташқи бурчаклари осилишни бошлайди, юзда майда ажинлар пайдо бўлади. Юз, уйдаги пала-партиш интерьер сингари бир аҳволга келиб қолади. Шу сабаб куннинг асосий қисми ўтадиган турар жойингизни кўнгилдагидек қулай ва эстетик завқ берадиган қилиб жиҳозлаш тавсия қилинади.
Изоҳ (0)