Instagram’да қандай қилиб миллионта обуначига эга бўлиш мумкин?

Халқаро селф-брендинг академияси асосчиси, персонал бренднинг бўйича мутахассис Марго Билинина қандай қилиб Instagram’да обуначилар сонини кўпайтириш мумкинлигига жавоб берди.

Нима учун миллион? Истагингиз машҳурликми ёки пул?

Машҳурлик бўлса, танилиш орқали нимага эришмоқчисиз? Ҳеч ким фақат машҳур бўлишни истагани учунгина шундай бўлиб қолмаганини ёдда тутинг.

Пулми?

Қанча ва қайси лойиҳалар орқали пул топишни истайсиз? Қачон, қайси томонга ҳаракатланаётганингиз ва қандай мақсадларни кўзлаганингиз, унга эришиш учун нималар қилаётганингиз муҳим.

Сизни бахтиёр қиладиган иш билан шуғулланинг

Машҳур кишиларнинг сири танилишни ёки обуначилар сонини кўпайтиришни истаганида эмас, ўзи ёқтирган иши билан шуғулланишида. Нимани қойиллатасиз, сизга нима ёқади нимани бажариб камолотга эришишни истайсиз? Шу саволларга жавобингиз бўлсин.

Мақсадли аудиторияни аниқлаб олинг

Сиз таклиф қиладиган нарса ҳамма учун қизиқ, деб ўйлаш керакли аудиторияни йиғиш имкониятини камайишига сабаб бўлади.

Сизни ким ўқимоқда? Таклифингиз уларга қизиқми? Мақсадли аудиторияни аниқлаб олинг. Aудиториянгиз ҳақида ҳамма нарсани билинг ва шундан келиб чиқиб стратегия тузинг у асосида мулоқот ўрнатишга киришинг. Одамлар билан мулоқот қилишга киришиш обуначилар сонининг ошишига сабаб бўлади. Шахсий брендга миллионлаб одамларни қизиқтириш қийин эканини инобатга олинг ва сиз тақдим қилаётган товар ёки хизматга кимлар қизиқиш билдириши мумкинлиги жиҳатидан келиб чиқиб иш тутинг.

Агар сизда истеъдод ва актёрлик маҳорати бўлсам вайнерлик билан катта аудитория йиғишингиз мумкин. Бунда аудиториянинг кўп бўлиши ҳамманинг кайфият кўтариш ва кўнгил ёзишга эҳтиёжи борлиги билан боғлиқ.

Шахсий бренд яратиш

Кўпчилик шахсий брендни аккаунт эгасининг юзи деб ҳисоблайди. Шахсий бренд бу шахсиятга тааллуқли нарсалар эмас. Бу аккаунт эгасининг аудитория учун мўлжалланган саҳналаштирилган образи.

Сизнинг саҳнада нима бор, нимани кўрсатасиз?

Шахсий бренд бу — сизнинг нима билан ўзига хослигингиз, нима учун сизни эслаб қолиш кераклигига асосланган образ. Instagram’да ўзингиз ҳақингизда ёзиш керак бўлган жойга 150 белги билан ўзингизни қисқа, аниқ ва ўзига хос таништиришингиз керак. Аммо 90 фоиз аккаунт эгалари бу борада хатога йўл қўяди: кимдандир кўчиради ёки бўлмаса, бўлар-бўлмас шиор ва кераксиз нарсалар ёзиб қўяди.

Нимани дўндирасиз? 

Имиж ясаб олишни ўзи етмайди, уни исботлаш ҳам керак. Энг зўр эканингиз ҳақидаги таъриф эса қуруқ гап холос. Контент асосида коммуникация ўрнатиш бу стратегия. Такрорланмас услуб, ташқи образ, аккаунтдаги концепция ва мулоқот ҳамда матнлар услубига эътибор беринг.

Одамлар сериални томоша қиладигандек «сторй» яратинг, обуначи фикри билан қизиқинг, қизиқтиринг. Ҳар бир кузатувчи ўзини сизнинг сериалингиз иштирокчисидек ҳис қилсин.

Промоут қилишни унутманг

Аккаунтингиз ҳақида кўпчилик хабардор бўлиши учун реклама чораларини кўришни унутманг. Бу блогер ва ташкилотчиларнинг «сторй», постлари ёки таргетинг бўлиши мумкин. Рекламани мақсад ва бюджетдан келиб чиқиб амалга ошириш керак. Ботлар ва фаол бўлмаган аккаунтлар билан обуначиларни кўпайтиришга уринманг.

Instagram’нинг имконият доирасидан четга чиқинг

Instagram сўнгги вақтда янги юлдузлар ва лойиҳалар туғиладиган, миллионлаб маблағ топса бўладиган кичик бир сайёрага айланди. Аммо аудиториянгиз бошқа жойда бўлиши мумкинлигини ҳам инобатга олган ҳолда офлайн тадбир, конференцияларда иштирок этинг, ОАВ учун қизиқ шахс бўлишга ҳаракат қилинг. Онлайн ва офлайн фаолликни бирлаштириш кўпроқ самара беради.