Майонездан салатлар ёки бошқа егуликларда соус учун фойдаланилмаса ҳам, унинг яна бир қанча фойдали жиҳатлари мавжуд. Айнан ошхонада эмас, балки бошқа мақсадлар учун уни харид қилишни унутмаслик лозим.
Бармоқларни асрайди
Аёлларнинг севимли тақинчоғи – узуклар кўпинча бармоқдан чиқмай қоладиган ҳолатлар учрайди. Бундай пайтда бармоқни ортиқча қийнашнинг кераги йўқ. Шунчаки майонездан бироз миқдорда узук атрофига суртиш ва озроқ кутиш керак. Сўнгра узук осонгина бармоқдан чиқиб кетади.
Идишларни силлиқлайди
Зангламайдиган пўлат идишларда турли чизиқлар ва доғлар пайдо бўлса, уларни бартараф қилиш учун майонез ёрдам келади. Майонездан идишларнинг муаммоли жойларига суртилади, кейин юмшоқ мато билан артилади. Натижада идишлар ўз кўринишини қайта тиклаб, порлоқ кўринишга эга бўлади.
Эшик овозини йўқотади
Гоҳида эшик очилиб ёпилганда одамнинг асаб толаларига таъсир қилувчи овоз чиқаради. Бунинг ечими ҳам айнан майонез маҳсулотида. Майонез эшикнинг ошиқ-мошиқ қисмига суртилади. Сўнг эшикларни очиб-ёпиш бир неча марта такрорланади. Натижа сизни қувонтириши аниқ.
Елим доғларини тозалайди
Янги харид қилинган идиш ёрлиқлари олиб ташлангандан сўнг елим изи яхши кўриниш бермайди. Айниқса, унинг юзасига чанг ва майда заррачаларнинг ёпишиб қолиши доғларни қорайтириб қўяди. Уни бартараф этишни билмайдиганлар учун майонез ажойиб ечим. Сабаби майонез бир неча сония ичида бундай доғларни кетказади.
Соч битларини ўлдиради
Майонез – битларга қарши курашиш учун уй шароитида энг самарали даволаш воситаларидан бири. Кечки пайт сочга майонез яхшилаб суртилади ва бошга махсус душ қалпоқчаси кийилади. Эрталаб соч аввал яхшилаб таралиб, сўнгра шампунь билан ювилади.
Тирноқларни парваришлайди
Майонез бироз чуқур идишга солинади. Бармоқ учлари 5-10 дақиқага маҳсулот ичига солинади. Ушбу жараён тирноқ атрофи терисини юмшатади, намлайди. Тирноқ пластинкасини мустаҳкамлайди, бу эса маникюр қилишни осонлаштиради.
Терини намлантиради
Агар тери қуруқ бўлса, майонез ёрдамида ниқоблар тайёрлаш мумкин. Шунингдек, тирсак, тизза, ёрилган товонларни даволаш учун ҳам майонездан фойдаланган яхши. Маълум миқдорда муаммоли жойларга суртилган маҳсулот терини юмшатади.
Қалам изларини олиб ташлайди
Агар уйда расм чизишни яхши кўрадиган болалар бўлса, у ҳолда ушбу маслаҳат, албатта, фойдали бўлади. Девор ёки бошқа жисм юзасида қолган қалам изларини ўчириш учун майонезни уларнинг устига бармоқ билан суриш керак. 10-15 дақиқадан сўнг тоза мато билан артилади. Албатта, бу жараён қалам изларини бутунлай бартараф этмайди, лекин қисман йўқотади.
Қичишишнинг олдини олади
Ҳамиша қуруқ бош териси унинг эгасига тинчлик бермаслиги табиий. Бундай пайтда соч илдизларига суртилган майонезни махсус қалпоқ остида ярим соатга қолдириш керак. Бу орқали бош териси тинчланади ва сочлар ажойиб ёрқин кўринишга эга бўлади.
Кумуш буюмларни тозалайди
Кумуш буюмлар ёки тақинчоқлар қорайган тусга кирган бўлса, уларнинг табиий ёрқинлигини майонез қайтариб беради. Майонез таркибидаги лимон кислотаси ёки сирка кумушнинг асл кўринишини тиклайди.
Сув доғларини йўқотади
Баъзи уй бекалар шифтда ёки тахта мебеллар юзасида пайдо бўлган доғлар ва чизиқларни йўқотиш учун майонездан фойдаланди. Тўғри, бу жуда кўп вақтни олади, аммо натижаси қувонтиради. Майонезнинг қалин қатлами зарарланган юзага сурилади ва 48 соат давомида ушлаб турилади. Сўнгра тоза мато ёрдамида тозаланади.
Сочларни қутқаради
Агар болалар ёки катталар сочига сақич ёпишган бўлса, уларни кесишга шошилмаган маъқул. Сақич ёпишган соҳага майонездан маълум миқдорда сурилади ва аста-секинлик билан сақич чиқариб олинади. Албатта, бир неча соч толаси қурбон бўлиши мумкин, лекин бу уларни кесишдан кўра афзал.
Изоҳ (0)