Ниқоб остидаги юз терисида қандай ўзгаришлар юз беради ва уни қандай парвариш қилиш керак?

Матодан тикилган юз ниқоби 2020 йилнинг асосий аксессуарига айланди. У мавсум танламайди. Шунинг учун ниқоб остида бўлаётган юз терисини қандай парваришлаш тўғрисида батафсил маълумот тақдим этилади.

Куз фаслида барча аёллар пардоз жараёнида, асосан, урғуни кўзга бергани шубҳасиз. Сабаби юзнинг деярли 70 фоизини беркитиб турган ниқоб туфайли аввалгидек тўлиқ пардоз қилишнинг ҳожати йўқ.

Ниқоб остидаги юз терисида нималар юз беради?

Коронавирусга қарши курашда шифокор ва ҳамшираларнинг ниқоби остидаги юз терисида нималар рўй берганини кўрсатувчи тасвирлар пайдо бўлди. Ниқоб билан боғлиқ бўлган асосий муаммо шундаки, у тери юзасида иссиқ ва нам муҳитни яратади. Ниқоб ўз ичидаги ҳавони тўғридан-тўғри ташқарига чиқиб кетишига йўл қўймайди. Бу эса терлаш ва ифлосланишга олиб келади, шунингдек, бактериялар кўпайиши учун муҳит яратиши мумкин.

Ниқоб кийган ҳолда терига қандай ғамхўрлик қилиш мумкин?

Гарчи ташқи кўриниш ўзгармаса ҳам, яллиғланиш, ҳуснбузар ёки тери қуриши хавфини камайтирувчи бир нечта муҳим тавсиялар мавжуд.

Аввал ва кейин юзни тозалаш

Кўчага чиқишдан аввал, албатта, пардоз қилмасдан туриб юзни яхшилаб тозалаш тавсия этилади. Кўчадан қайтгандан сўнг ниқоб остида намланиб, ўз таъсирини ўзгартира бошлаган пардозни ювиш керак. Шунда ҳам пардоз, ҳам тўпланаётган бактериялар манбайидан халос бўлиш мумкин.

Бунинг учун нозик тозаловчи маҳсулотдан фойдаланиш керак. Шундоқ ҳам юз терисига қийин бир вазиятда уни қаттиқ скраблар билан тозалаш мумкин эмас.

Енгил намлантирувчи кремдан фойдаланиш

Куз деразадан ташқарида бўлса-да, юзни намлантирувчи крем воситалари ёрдамида парваришлаш самарали ҳисобланади. Айниқса, крем воситаси қанчалик енгил ва майин бўлса, терига шунча тез сингади ва ниқоб остида буғланиб тери тешикларига тиқилиб қолмайди.

Агар тери қуруқлиги кўплиги туфайли қўшимча намлантиришга муҳтож бўлса, кун давомида фойдаланиш учун намлантирувчи воситадан фойдаланиш керак.

Тонал кремларини рад этиш

Бу бироз ғалати туюлиши мумкин, лекин юз терисида пардоз қатламлари қанчалар кўп бўлса, буғланиш ортиб, натижада тери нафас олиши қийинлашади. Шунинг учун иложи борича тери учун фойдали воситадан бошқа, яъни пардоз буюмларидан камроқ фойдаланиш энг яхши парвариш ҳисобланади. Тонал кремлари ўрнига ББ ва CC каби енгил бўлган воситалардан фойдаланиш мумкин. Ёки минерал пудралардан фойдаланиш тавсия этилади.

Яхшиси, ташқарига чиққанда умуман бўянишларсиз бориш оқилона қарор бўлади. Аслида пардозсиз юз жуда гўзал ҳисобланади, фақат буни ҳар ким ҳам билавермайди.

Энг муҳими, ниқобни мунтазам равишда ювишни унутмаслик керак. Шундагина унинг қатламларида сақланиб қолган чанг ва бактериялар бартараф этилади. Шунингдек, тез-тез ювилган ниқоблар юз терисига унчалик ҳам зарар ўтказмайди ва юзни яхши ҳолатда сақлашга ҳаракат қилади. Айтганча, ниқоб тақишда пахта матосидан тайёрланганидан фойдаланиш зарур. Чунки у синтетик матодан кўра фойдали бўлиб, унга қараганда иссиқ эмас.