Дунё, умуман олганда, коронавирус тарқалишига тайёр эмас эди, деб маълум қилди Жаҳон соғлиқни сақлаш ташкилоти бош директори Тедрос Адханом Гебрейесус. Шу билан бирга, у, ўз фикрича, соғлиқни сақлаш ривожланишига тўғри ҳисса қўшган давлатларни санаб ўтди, деб ёзади «Коммерсантъ».
Янги Зеландия ва Руанда, Гебрейесуснинг фикрича, умумий тиббий ёрдам тизимига муваффақиятли ҳисса қўшган. «Биз сайёрадаги ҳар бир инсон жисмоний ва руҳий саломатликнинг энг юқори даражасига эришиш учун зарур тиббий хизматлардан фойдаланиш имкониятига эга бўлишини таъминлашимиз керак», — деб Гебрейесус Financial Times учун ёзган мақоласида бошқа мамлакатларга мурожаат қилди.
ЖССТ раҳбари Таиландни ҳам ажратиб кўрсатиб, у ерда тиббиёт ходимлари фуқароларни уйларига бориб кўриб чиқиш орқали «инсонийлик ва маҳаллий бирлашма ҳисси»ни намоён қилганини қайд этди. Шу йўл билан мамлакат янада саноатлашган давлатларга нисбатан ажралиб туришга муваффақ бўлган. «Ўнлаб йиллар давомида соғлиқни сақлаш тизимига сарфланган эътибор унга январь бошида COVID-19 келишига тезкорлик билан жавоб қайтариш имконини берди», — деди у.
Ғарб мамлакатлари ҳақида гапирар экан, Гебрейесус Италияни алоҳида қайд этди: унинг фикрича, «миллат даражасидаги ҳамкорлик ва илмга содиқлик» мамлакатга инфекциянинг ёппасига тарқалиб кетишини енгиб ўтишда ёрдам берган.
Эслатиб ўтамиз, дунё бўйича коронавирус инфекцияси асоратлари оқибатида вафот этганлар сони 1,1 миллион кишидан ошди.
Аввалроқ Жаҳон соғлиқни сақлаш ташкилоти раҳбари Тедрос Гебрейесус Дексаметазон – COVID-19 га қарши курашда самарали экани исботланган ягона дори воситаси эканлигини маълум қилган эди.
Шунингдек, ошқозон яраси ва бактериал инфекцияларни даволашда ишлатиладиган микробларга қарши препарат Ранитидин висмут ситрати (РВC) COVID-19 билан оғриган беморлар муолажасида ҳам яхши таъсир кучига эга экани маълум бўлди.
Изоҳ (0)