Самарқандда «Афросиёб» поездининг темир йўл рельсига тош бўлаги қўйган 40 ёшли шахс аниқланди. Бу ҳақда ИИВ ахборот хизмати хабар берди.
Маълум қилинишича, 12 октябрь куни Самарқанд вилояти Ички ишлар бошқармаси Транспорт хавфсизлигини таъминлаш бошқармаси тергов бўлими навбатчилик қисмига Транспортда ХТББ ЙПКБ ходими, лейтенант У.М. телефон орқали 759-сонли Қарши–Самарқанд–Тошкент йўналишидаги «Афросиёб» тезюрар йўловчи поезди Гумбаз–Мароқанд темир йўл бекатлари оралиғида ҳаракатланаётган вақтида темир йўл рельсига тош қўйилганлиги ҳақида хабар қилди.
Суриштирув давомида «Афросиёб» тезюрар йўловчи поезди Гумбаз–Мароқанд темир йўл бекатлари оралиғининг 3741 километр 7-пикетида ҳаракатланиши вақтида темир йўл изининг ўнг томонига тош бўлаги қўйган шахс 1980 йилда туғилган, Самарқанд вилояти, Пастдарғом тумани, Жовулқосим қишлоғида яшовчи фуқаро Н.Ш. эканлиги аниқланган.
Ҳозирда суриштирув ишлари давом этмоқда.
Аввалроқ Самарқандда юк поезди қулоқчин таққан йигитни уриб кетмаслик учун фавқулодда тўхташни амалга оширгани хабар қилинганди.
Изоҳ (0)