Монополияга қарши курашиш қўмитаси UzAuto Motors’ни давлат органига нисбатан ахлоқий меъёрлардан чиқмаган ҳолда мулоҳаза юритишга чақирди
16 октябрь куни Тошкент шаҳар маъмурий судида UzAuto Motors АЖнинг Монополияга қарши курашиш қўмитаси махсус комиссиясининг 2020 йил 19 августдаги қарорини ҳақиқий эмас деб топиш тўғрисидаги шикоят аризасини кўриб чиқиш бўйича ўтказилаётган суд жараёни давом эттирилгани тўғрисида хабар берилганди. Монополияга қарши курашиш қўмитаси UzAuto Motors’ни давлат органига нисбатан ахлоқий меъёрлардан чиқмаган ҳолда мулоҳаза юритишга чақирди.
Таъкидланишича, Монополияга қарши курашиш қўмитаси шу вақтга қадар суд жараёни тафсилотларига ҳеч қандай изоҳ бермай келган, чунки UzAuto Motors АЖ томонидан келтирилган ҳар қандай даъво ва шикоятларига қўмитанинг экспертлари томонидан бевосита иш кўрилиш жараёнида жавоб бериб келинмоқда.
Бироқ UzAuto Motors вакиллари ҳали ёпилмаган суд иши тафсилотларига ўзларининг расмий муносабатларини билдириб, ҳиссиётга берилган ҳолда очиқчасига давлат органи ходимларини нопрофессионал ва малакасизликда айбламоқда. Жумладан: «...текширувга жалб этган экспертларнинг салоҳиятсизлиги мижозлар базамизнинг бир қисмининг кўнгли совишига олиб келганлигидан афсусдамиз...»Эслатиб ўтамиз, депутат Расул Кушербаевнинг танқидлари ортидан Монополияга қарши курашиш қўмитаси UzAuto Motors АЖга нисбатан иш қўзғатган эди. Қўмита компания томонидан «Рақобат тўғрисида»ги қонунни бузиш аломатларини аниқлаган.Суд йиғилишининг 3-куни ҳам бундан мустасно бўлмади. Хусусан, АЖ томонидан қуйидагилар эълон қилинди: «Тингловлар жавобгарнинг аргументлари заиф эканлигини тасдиқлади ва бу кутилган ҳолат эди...».
Монополияга қарши курашиш қўмитаси ушбу масала бўйича қуйидагиларни маълум қилади:
UzAuto Motors АЖнинг илтимосномасига кўра, навбатдаги суд иши ёпиқ кўрилгани учун қўмита қонунни бузмаган ҳолда, жараён давомида томонлар ўртасида бўлиб ўтган барча тортишув ва қарама-қаршиликлар тафсилотларини ошкор эта олмайди. Аммо қўмита UzAuto Motors АЖ томонидан, махсус комиссия қарорига нисбатан қарши келтирилган далиллар етарли даражада асосланмаганлигини ишонч билан эълон қилади! Шу билан бирга, судда «айбланувчининг далиллари заифлиги» тасдиқланмаган. Эслатиб ўтамиз, суд жараёни кейинги ҳафтанинг жума кунига қолдирилди.
Юқоридагилардан келиб чиқиб, Монополияга қарши курашиш қўмитаси UzAuto Motors АЖни давлат органига нисбатан ахлоқий меъёрлардан чиқмаган ҳолда мулоҳаза юритишга чорлайди.
Монополияга қарши курашиш қўмитаси
Мавзуга доир: Олий суд UzAutoMotors ва Монополияга қарши кураш қўмитасининг навбатдаги ёпиқ суди ҳақида маълумот берди
Мазкур ўрганиш натижалари омма учун эълон қилингач UzAuto Motors Монополияга қарши курашиш қўмитаси қошидаги махсус комиссия қабул қилган қарор устидан судга шикоят қилишини билдирганди ва кейинроқ компания Тошкент шаҳар маъмурий судига шикоят қилгани маълум бўлганди.
