Замбия дефолт ҳолатини эълон қилган биринчи Африка мамлакати бўлиши мумкин. Бутун бошли мамлакатнинг банкрот бўлишига коронавирус пандемияси сабабчи бўлди, деб хабар беради Financial Times.
Агар Замбиянинг уч миллиард долларлик облигацияларига эгалик қилувчи инвесторлар Жанубий Африка давлатининг тўловларни тўхтатиб туриш ҳақидаги илтимосини рад этса, мамлакат хонавайронлик ёқасида қолади. Дефолт хавфига қарамай, облигацияга эгалик қилувчилар Замбия ҳукуматининг илтимосини рад этмоқчи, чунки барча кредиторларга ҳам бир хил муносабат кўрсатилмайди.
Бундан ташқари, облигациялар эгалари Замбия макроиқтисодий дисбалансни бартараф этиш бўйича ўз режалари ҳақидаги маълумотни етарли даражада ошкор қилмаганидан норози. Тўлаш муддати 2024 йилгача бўлган мамлакат облигациялари дефолт ҳақида огоҳлантирилгандан кейин уч фоиздан кўпроққа тушиб кетди.
Июль ойида Американинг Fitch Ratings агентлиги 2020 йилнинг олти ойи бўйича 33 та мамлакатнинг суверен рейтингини пасайтирди, бу рекорд кўрсаткич бўлди. Коронавирус пандемияси фонида юздан ортиқ мамлакат апрель ойида Халқаро валюта жамғармасига мурожаат қилиб, молиявий инқирозни енгиш учун шошилинч кредит ёрдами беришни сўраган эди. Уларнинг ўнлаб нафари дефолт ёқасида қолган. Август ойида коронавирус пандемияси Европа иқтисодиётини 10-20 йил ортга сургани маълум қилинган эди.
Шунингдек, карантин сабабли Ҳиндистон иқтисодиёти қулагани хабар берилди. Ҳиндистон иқтисодиёти 2020 йилнинг апрель—июнь ойларида 2019 йилнинг шу даврига нисбатан 23,9 фоизга пасайди. Германия канцлери Ангела Меркель эса мамлакат иқтисодиёти коронавирус туфайли янги чекловларга тайёр эмаслигини айтди.
Изоҳ (0)