Россия Федерал хавфсизлик хизмати Волгоград шаҳрида Суриядаги террорчилар кўрсатмаси асосида теракт режалаштирган икки нафар жангарини йўқ қилгани тўғрисида хабар берилганди. «РИА Новости»ининг Россия Тергов қўмитасига таяниб ёзишича, жангарилар ўзбекистонлик бўлиб, ҳозирда ҳолат юзасидан жиноят иши қўзғатилган.
Террорчилик фаолиятини мувофиқлаштириш Суриядан амалга оширилган. Махсус хизматлар хабарига кўра, жангарилар «Тавҳид ва жиҳод катибаси» халқаро террорчилик ташкилотининг аъзолари бўлиб, ҳокимият органлари биноларига, ҳарбий хизматчиларнинг яшаш жойларига ҳамда портлаш ва ёнғин хавфи бўлган корхоналарга ҳужум уюштиришни режалаштирган.
«Ҳуқуқ-тартибот органлари ходимларининг ҳаётига тажовуз қилишга уриниш факти бўйича жиноят иши қўзғатилди», — дейилади хабарда.
Тергов қўмитасининг маълум қилинишича, ҳужрада порловчи қурилмаларга эга 23 ва 27 ёшли Ўзбекистон фуқаролари таслим бўлиш борасидаги талабларни бажармасдан ўт очган ва йўқ қилинган.
Жангариларнинг яшаш жойида ўқотар қуроллар, ўқ-дорилар, кимёвий ва зарарловчи моддалар ҳамда қўлбола портловчи воситалар, диний характердаги адабиётлар, шунингдек, Волгограднинг теракт режалаштирилган жойлари белгиланган харитаси топилган.
Изоҳ (0)