Қирғизистонда такрорий парламент сайловлари 20 декабрда ўтказилиши мумкин

Қирғизистонда парламент сайловларини қайтадан ўтказиш 20 декабрга режалаштирилмоқда, деб ёзади «Коммерсантъ» республика Марказий сайлов комиссиясига таяниб. Республикада президент сайловлари 17 январь куни ўтказилиши мумкин.

«Такрорий парламент сайловлари икки ой муддатда ўтказилади, у МСК томонидан белгиланиши сабабли биз уни, тахминан, 20 декабрга мўлжалладик… Муддатидан аввалги президент сайловларини Жўқорғи Кенеш белгилайди. Бу, тахминан, 17 январда бўлади», — деди МСК раҳбари Нуржан Шайлдабекова.

Эслатиб ўтамиз, Қирғизистон президенти вазифасини бажарувчи бўлиб турган парламент спикери Канат Исаев президентлик лавозимидан истеъфога чиққанини маълум қилди. Сўронбай Жээнбеков 15 октябрь куни эрталаб Қирғизистон президентлиги лавозимидан истеъфога чиқишини маълум қилгач, Канат Исаев автоматик равишда Қирғизистон президенти вазифасини бажарувчи лавозимини эгаллаганди. Энди давлат раҳбари вазифасини бажарувчи лавозими амалдаги бош вазир Садир Жапаров зиммасига ўтди.

Қирғизистонда 5 октябрдан буён парламент сайлови натижаларидан норозилик сабабли юзага келган сиёсий инқироз давом этмоқда. Мухолифат партиялари сайлов натижаларидан норози бўлди, мамлакатда норозилик намойишлари ва тартибсизликлар бошланди. Шундан сўнг сайлов натижалари бекор қилинди ва ҳукумат истеъфога чиқди.