Ижтимоий тармоқларда Давлат статистика қўмитасининг янгиланган «New.stat.uz» сайти рўйхатдан ўтган юридик шахсларнинг раҳбари, таъсисчилари тўғрисидаги маълумотларни тақдим этишни тўхтатгани тўғрисида хабарлар тарқалди. Telegram’даги «Расмий хабарлар» каналининг Давлат статистика қўмитаси ахборот хизмати раҳбари Усмон Абдурасуловга таяниб маълум қилишича, янги сайт ҳозирча расмий сайт деб қабул қилинмаган.
Таъкидланишича, 2020 йилнинг январидан бошлаб қўмитанинг янги ва замон талабларига тўлиқ жавоб берадиган сайти ишлаб чиқилган — «New.stat.uz».
«Ушбу расмий веб-сайт ҳозирги кунда тест режимида ишламоқда. Шунинг учун ҳам унинг контенти ҳар куни тўлдириб борилмоқда. Бу ҳозирчалик расмий сайт деб қабул қилингани йўқ. Ундаги барча функциялар тўлиқ ишлаб кетганидан кейингина расмий сайт деб эълон қилинади», — дейилади хабарда.
Қўмита матбуот хизмати раҳбарининг қайд этишича, тизимда профилактика ишлари амалга оширилганлиги муносабати билан айрим маълумотларни вақтинчалик тақдим қилиб бўлмаган.
«Ушбу корхона ва ташкилотларнинг ягона давлат регистрининг маълумотлар базасида ҳозирги кунда 1,4 миллион бирликдаги субъектлар ҳақида барча маълумотлар сақланиб келинмоқда. Ундан керакли бўлган маълумотларни излаб топишда маълум бир техник муаммолар келиб чиқиши табиийдир. Юзага келган мазкур ноқулайликлар учун узр сўраймиз. Ҳозирги вақтда ушбу функциянинг фаолияти тўлиқ йўлга қўйилди ва ундан хоҳлаган маълумотингизни олишингиз мумкин», — дейди Абдурасулов.
Изоҳ (0)