Президентнинг «Ўрмон хўжалиги соҳасида кадрлар тайёрлаш тизимини такомиллаштириш, илм-фанни ривожлантириш, илмий-тадқиқот ишларини рағбатлантириш чора-тадбирлари тўғрисида»ги қарори лойиҳаси эълон қилинди.
Ўрмон хўжалиги давлат қўмитаси Қишлоқ хўжалиги вазирлиги, Олий ва ўрта махсус таълим вазирлиги, Инновацион ривожланиш вазирлигининг 2020/2021-ўқув йилидан бошлаб Тошкент давлат аграр университетининг Ўрмон хўжалиги ва ландшафт дизайн факультети негизида университет таркибидаги Ўрмон хўжалиги институтини ташкил этиш тўғрисидаги таклифи маъқулланиши мумкин.
Қуйидагилар институтнинг асосий вазифалари этиб белгиланади:
- ўрмон хўжалиги ерларидан самарали фойдаланиш, ўрмон селексияси ва уруғчилиги, кўчатчилигини ривожлантириш, кўпайтириш, ўрмонларни муҳофаза қилиш, фойдаланиш борасида илмий-тадқиқот ва тажриба-синовлари ўтказиш ҳамда олий малакали кадрлар тайёрлаш ишларини амалга ошириш;
- илғор хорижий тажрибалар асосида Институт таркибидаги таълим йўналишлари ва мутахассисликларининг ўқув режаларини таълимнинг кредит-модул тизимига босқичма-босқич ўтказиш;
- ўқув-лаборатория базасини модернизациялаш, фан дастурларида соҳа бўйича замонавий ишлаб чиқариш жараёнлари, юқори унумли ва ресурс тежамкор илғор технологиялар бўйича билимларни акс эттириш;
- талабаларнинг ўқув машғулотлари, малакавий амалиётларни ўтишда инновацион ва янгича фикрлашга йўналтирадиган янги интерфаол услубларни, шу жумладан, талабаларнинг мустақил изланишини таъминловчи механизмларни кенг жорий этиш;
- ривожланган хорижий илмий-тадқиқот ва олий таълим муассасаларида профессор-ўқитувчилар, илмий ва илмий-педагог кадрларнинг малакасини ошириш ва стажировкаларини ташкил этиш;
- профессор-ўқитувчилар, илмий-тадқиқотчилар, талабаларнинг инновацион технологияларни яратиш ҳамда жорий этиш борасидаги ташаббускорлиги ва моддий манфаатдорлигини ошириш мақсадида давлат хусусий шериклик шартлари асосида «Кичик инновацион корхона»лар ташкил этиш;
- ўрмон хўжаликлари раҳбарлари ва кластерлари мутахассислари учун семинар-тренинглар ҳамда ахборот-маслаҳат хизматларини ташкил этиш, бакалавр, магистр, таянч докторантлар ва докторантларнинг амалиёти ҳамда илмий-тадқиқотлар ишларини мувофиқлаштириш;
- давлат илмий-техник дастурлари доирасида бажариладиган лойиҳалар ҳамда халқаро ташкилотларнинг грантлари танловида иштирок этиш, соҳага доир долзарб мавзулар юзасидан илмий-тадқиқот ишларини амалга ошириш;
- ўрмон барпо этиш ва етиштиришнинг замонавий агротехнологик ишланмаларини ишлаб чиқиш;
- касаллик ва зараркунандалардан ҳоли бўлган (in-vitro усулида) ўрмон дарахт ва буталарининг уруғ ва кўчатларини етиштириш, ишлаб чиқаришга кенг татбиқ этиш бўйича амалий кўникмаларни шакллантириш.
Институтга 2021/2022-ўқув йилидан бошлаб ўрмон хўжаликлари ва иқтисодиёт тармоқларининг кадрларга бўлган эҳтиёжларидан келиб чиқиб, ҳар йили тасдиқланадиган республика олий таълим муассасаларига ўқишга қабул қилишнинг давлат буюртмаси ва қўшимча қабул параметрлари доирасида белгиланади.
Қорақалпоғистон ва ҳудудлардаги ўрмон хўжаликларини юқори малакали кадрлар билан таъминлаш мақсадида институтга 2021/2022-ўқув йилидан бошлаб Ўрмон хўжалиги давлат қўмитаси раисининг тавсияномасига асосан ўрмончилар ва уларнинг фарзандлари учун олий таълим муассасаларининг тегишли бакалавриат таълим йўналишларига давлат гранти асосида белгиланган қабул квотасига қўшимча 20 фоиз ажратилади.
Изоҳ (0)