Бокс бўйича оғир вазн тоифасида WBC чемпионлик камари соҳиби Тайсон Фьюри собиқ чемпион Деонтей Уайлдер билан учинчи жангда иштирок этишдан воз кечганини маълум қилди.
«Мен Уайлдернинг юзини яна бир бор бежаб қўйишни истагандим — бу мен учун жуда тез ва осон ўтган жанг бўларди. Аммо у ва унинг жамоаси ҳали ҳам жанг санаси борасида бир қарорга келмади. Улар чемпион билан жанг қилишни у қадар истамаяпти.
Улар мендан жангни декабрга қолдиришни сўради — жангни 19 декабрга қолдиришга рози бўлдим. Кейин яна санани суришни хоҳлашди, буниси кейинги йилга.
Мен шуғуллангандим, тайёр эдим. Бироқ улар 19 декабрдаги жангни 2021 йилга қолдиришни сўради, буниси энди ўтиб тушди. Мен олға юришда давом этаман», — дейди Фьюри.
Эслатиб ўтамиз, 2018 йилнинг декабрь ойида бўлиб ўтган биринчи баҳсда ғолиб номи аниқланмаганди. 2020 йилнинг февраль ойида ўтказилган иккинчи жангда эса Фьюри Уайлдерни еттинчи раундда техник нокаут билан мағлубиятга учратган ва WBC чемпионлик камарини ундан тортиб олганди.
Изоҳ (0)