АҚШ Меҳнат вазирлиги болалар меҳнатининг энг ёмон шакли бўйича йиллик хулосаларининг 19-нашрини эълон қилди (TDA ҳисоботи), деб хабар бермоқда «Gazeta.uz». Унда болалар меҳнатига қарши курашиш бўйича 131 та давлат ва ҳудудларнинг саъй-ҳаракатлари белгиланиб борилади. Ушбу кўрсаткич бўйича мамлакатларга «салмоқли», «ўртача», «минимал» тараққиёт баҳолари берилади ёки «яхшиланиш йўқ» деб қайд этилади.
Ҳисоботда айтилишича, 2019 йилда Ўзбекистонда болалар меҳнатининг энг ёмон шаклларига барҳам бериш бўйича ўртача тараққиёт кузатилган. Ҳукумат пахта йиғим-терими даврида болалар меҳнатидан фойдаланишнинг олдини олиш чораларини кўрган. Шу жумладан, оғир шароитларда меҳнат қилиш тақиқини такроран бузганларга нисбатан жиноий жавобгарлик белгиланган, меҳнат инспекторлари сони икки баравар оширилган, болалар меҳнатини тақиқловчи ва уларни бузганлик учун жавобгарлик тўғрисида қонунлар бўйича жамоатчилик хабардорлигини юзасидан кенг кўламли ишлар амалга оширилган.
Бундан ташқари, ҳукумат томонидан Одам савдосига ва мажбурий меҳнатга қарши курашиш миллий комиссияси ташкил этилди ва мажбурий меҳнатга қарши курашиш бўйича янги ҳаракатлар режасини қабул қилди.
«Шунга қарамай, Ўзбекистонда болалар меҳнатининг энг ёмон шакллари қўлланилади, шу жумладан, болаларни тижорий мақсадда жинсий эксплуатация қилиш. Ҳукумат болалар мажбурий меҳнатига қарши курашнинг барча соҳаларида бирлашган саъй-ҳаракатларни амалга оширган бўлса-да, болаларни тижорат йўлида жинсий эксплуатация қилишни тақиқловчи қонун-қоидалар халқаро стандартларга мувофиқ келмайди», — дейилади ҳисоботда.
Изоҳ (0)