Пандемия даврида дунёдаги миллиардерларнинг бойлиги рекорд даражада ўсгани маълум бўлди

Дунёдаги миллиардерларининг умумий бойлиги миқдори пандемия вақтида 27,5 фоизга ўсиб, 2020 йилнинг июль ойи охирида 10,2 триллион долларга етди. Бу 2017 йилнинг охирида қайд этилган 8,9 триллион долларни ортда қолдирган янги рекорд, деб ёзмоқда «РБК».

Маълум қилинишича, мазкур маълумотлар UBS ва PwC компаниялари томонидан амалга оширилган таҳлиллар асосида олинган.

Компаниялар одатда бундай таҳлиллар натижаларини апрель ойидаги маълумотлар асосида тайёрлайди. Бироқ 2020 йилда «COVID-19’нинг ўзгартирувчи эффектини» ва март ойидаги пасайишдан кейин фонд бозорининг тикланишини қамраб олиш учун таҳлиллар муддати июль ойининг охиригача узайтирилган.

7 апрель ҳолатига кўра, дунёда 2058 нафар миллиардер бўлган. Бу 2019 йилга нисбатан 43 нафарга кам. Уларнинг умумий бойлиги 8 триллион долларга баҳоланган. Тадқиқот якунланадиган сана — 31 июлда миллиардерлар сони 2189 нафарга етган ва уларнинг бойлиги 10,2 триллион долларни ташкил қилган.

Тадқиқот муаллифларининг маълум қилишича, апрель—июль ойларида фонд бозоридаги ўсиш сабабли миллиардерларнинг бойлиги янги рекордни қайд этган.

2020 йилнинг биринчи ярмида пандемия дунё иқтисодиётининг бир қисмини деярли тўхтатди ва «фонд бозорларида бўронни юзага келтирди. Февраль ва март ойларида бир неча ҳафта ичида миллиардерларнинг бойлиги 2019 йилга нисбатан 6,6 фоизга ёки 564 миллиард долларга камайган. Бироқ июль ойининг охирига келиб уларнинг бойлиги миқдори 2019 йилдаги кўрсаткичдан ўтиб кетди.

Сўнгги беш йилда биринчи марта айнан 2019 йил бойликларнинг камайиши билан эсда қолган. Бироқ сўнгги ўн йилликда миллиардерларнинг сони қарийб уч мартага кўпайган ва бойлик миқдори 2,8 триллион доллардан 8 триллион долларга ошган, миллиардерларнинг сони эса 2009 йилдаги 969 нафардан икки баравар кўпайган.