Берлин Сенати коронавирусга чалинган беморларнинг кўпайиши фонида карантин чекловларни кучайтиришга қарор қилди. Бу ҳақда Berliner Morgenpost’га таяниб «РБК» хабар бермоқда.
Ҳокимият қарорида тунда дўконлар, барлар, ресторанлар ва клубларни ёпиш, шунингдек, хусусий тадбирларга ташриф буюрувчилар сонини чеклаш кўзда тутилган.
Дўконлар, барлар, ресторанлар ва клубларда тунги комендантлик соати 23:00 дан 06:00 гача бўлади.
Ёпиқ жойдаги шахсий байрамларда қатнашиш учун чекловлар мавжуд. Уларга ташриф буюрувчилар сони 25 дан 10 тага камайтирилди. Шу билан бирга, соат 23:00 дан 06:00 гача беш кишидан кўп бўлмаган гуруҳлар очиқ ҳавода йиғилишига рухсат берилади.
Янги чора-тадбирлар 10 октябрь соат 00:00 дан кучга киради ва 31 октябргача амал қилади.
Маълум қилинишича, Германиядаги шифокорлар август ойининг бошларида мамлакатда коронавируснинг иккинчи тўлқини бошланганини эълон қилди. Немис шифокорлари ассоциацияси раиси Сюзанна Йона таъкидлашича, Германияда вирус тарқалишининг такрорий ва бир маромда ўсиши кузатилмоқда. Шу билан бирга, у кейинчалик касалланганлар сони бўйича иккинчи тўлқинни март ва апрель ойлари кўрсаткичлари билан таққослаш мумкин эмаслигини таъкидлади.
Немис шифокорлари ассоциацияси раиси, Германия клиникалари коронавируснинг иккинчи тўлқини учун тайёр, деб ишонтирди.
Жон Ҳопкинс университетининг 7 октябрдаги маълумотларига кўра, Германияда 303 мингдан ортиқ COVID-19 билан касалланиш ҳолати қайд этилган. Касаллик оқибатида 9546 киши вафот этган.
Эслатиб ўтамиз, Канада, Чехия, Австрия ва Грузияда ҳам коронавируснинг иккинчи тўлқини бошлангани ҳақида хабар берилган эди. Буюк Британияда COVID-19 билан боғлиқ вазият баҳордаги кўрсаткичга қайтмоқда. Бир ойдан бери туристлар учун очиқ бўлган Туркияда коронавирус тарқалиши яна авж олди. Исроил эса «герметик» карантин жорий қилди.
Изоҳ (0)