Европада хавфсизлик ва ҳамкорлик ташкилотининг Минск гуруҳи ҳамраислари — Россия, АҚШ ва Франция яқин кунларда Тоғли Қорабоғдаги низони ҳал қилиш бўйича музокаралар ўтказади. Бу ҳақда Франция ташқи ишлар вазири Жан Ив Ле Дриан маълум қилди, деб ёзмоқда Meduza.
Ле Дрианнинг сўзларига кўра, учрашувлар 8 октябрь куни Женевада ва 12 октябрь куни Москвада бўлиб ўтади, вазир учрашувлар қандай таркибда бўлиб ўтишига аниқлик киритмаган.
Кейинроқ Озарбайжон Ташқи ишлар вазирлиги идора раҳбари Жейҳун Байрамов Женевада учта воситачи давлат вакиллари билан бўлиб ўтадиган учрашувда қатнашишини маълум қилган. «Ташрифнинг мақсади — ЕХҲТнинг Минск гуруҳи ҳамраислари билан учрашиш ва иккинчи томонга Тоғли Қорабоғдаги низони ҳал қилиш бўйича Озарбайжоннинг позициясини етказиш», — дейилади Озарбайжон Ташқи ишлар вазирлиги хабарида.
Россия Ташқи ишлар вазирлигининг маълум қилишича, 12 октябрь куни Арманистон ташқи ишлар вазири Москвада Сергей Лавров билан учрашади. Бу учрашувда Франция ва АҚШ вакилларининг иштирок этиши ёки этмаслиги маълум қилинмаган.
Тоғли Қорабоғда кенг қамровли жанговар ҳаракатлар 27 сентябрдан буён давом этмоқда. Бу минтақадаги сўнгги ўн йилликда кузатилган энг жиддий тўқнашув бўлмоқда.
Аввалроқ Россия, АҚШ ва Франция президентлари Владимир Путин, Дональд Трамп ва Эммануэль Макрон Тоғли Қорабоғ ҳудудида давом этаётган жанговар ҳаракатларни зудлик билан тўхтатишни талаб қилганди.
Изоҳ (0)