Ижтимоий тармоқларда 2020 йилнинг 7 октябрь куни бўйни ва қўллари арқон билан боғланган ҳамда унга тан жароҳати етказиш аломатлари мавжуд кўринишда трактор тиркамасида мажбурий равишда олиб кетилаётган фуқаро акс этган видео тарқалди. Тергов департаментининг маълум қилишича, ҳолат юзасидан Навоий вилояти ИИБ ходимлари томонидан олиб борилган терговга қадар текширув ҳаракатлари даврида қуйидагилар аниқланган.
Қайд этилишича, 2020 йилнинг 3 октябрь куни соат 10:30 да Навоий вилояти Қизилтепа тумани «Янгиҳаёт» МФЙ ҳудудида жойлашган фермер хўжалиги ер майдонида ушбу фермер хўжалик ишчиси бўлган 32 ёшли С.Ш. спиртли ичимлик истеъмол қилиб маст ҳолда фермер хўжалиги раҳбари 26 ёшли Ж.Н.ни шаъни ва қадр-қимматини камситувчи ҳар хил қўпол сўзлар билан ҳақоратлаган.
Фермер хўжалиги раҳбари Ж.Н. ишчиси С.Ш.ни юзи ва танасининг турли жойларига уриб, тепган ҳолда жароҳат етказиб, бўйнидан арқон билан боғлаган. Сўнгра қўшни фермер хўжалиги тракторчиси фуқаро 28 ёшли С.Н. билан биргаликда унинг тракторида фуқаро С.Ш.ни фермер хўжалигининг дала шийпонига олиб бориб, қийноққа солиб дарахтга боғлаб кетганликлари аниқланган.
Шу куни бўлган ҳолатни Ж.Н. ўзининг қўл телефонига видеога олиб, таниши Т.Р.га Telegram мессенжери орқали юборган. Т.Р. эса видеони Қизилтепа туманидаги танишларига тарқатганлиги аниқланган.
Бундан ташқари, 2020 йил 4 октябрь куни фуқаро С.Ш. фермер хўжалиги раҳбари Ж.Н.нинг Қизилтепа тумани «Азизобод» МФЙдаги яшаш хонадонига бир кун олдинги ҳолатга ойдинлик киритиш мақсадида борганида фермер хўжалиги раҳбарининг отаси 52 ёшли Н.В. ўзаро тортишувдан сўнг С.Ш.ни яшаш хонадонига олиб кириб, танасининг турли жойларига уриб, тан жароҳати етказганлиги аниқланган.Мазкур ҳолат юзасидан Қизилтепа туман ИИБ ҳузуридаги тергов бўлинмаси томонидан Жиноят кодексининг 109-моддаси 2-қисми (қасддан баданга енгил шикаст етказиш) ва 138-моддаси 1-қисми (зўрлик ишлатиб ғайриқонуний равишда озодликдан маҳрум қилиш) билан жиноят иши қўзғатилган. Ҳозирда ҳолат юзасидан суриштирув ишлари давом этмоқда.
Юқоридаги каби ҳаракатлар Маъмурий жавобгарлик тўғрисидаги кодексининг 189-1-моддаси ва Жиноят кодексининг 130-1-моддаларида кўрсатилган «Зўравонликни ёки шафқатсизликни тарғиб қилувчи маҳсулотни тайёрлаш, олиб кириш, тарқатиш, реклама қилиш, намойиш этиш» каби маъмурий ва жиноий жавобгарликни келтириб чиқариши департамент томонидан эслатиб ўтилган.
Аввалроқ Самарқандда оила аъзолари томонидан калтакланиб, уйидан чиқариб юборилган аёл воқеаси бўйича расмий муносабат билдирилганди.
Изоҳ (0)