Украинанинг SkyUp Airlines авиакомпанияси Тошкент ва Киев ўртасида мунтазам қатновларни йўлга қўйишни режалаштирмоқда. Бу ҳақда Туризмни ривожлантириш давлат қўмитаси маълум қилди.
Таъкидланишича, SkyUp Airlines мунтазам қатновларни икки мамлакат минтақалари ўртасидаги рейслар сонини босқичма-босқич кенгайтириш билан йўлга қўйишни мўлжаллаган.
Шу мақсадда Туризмни ривожлантириш давлат қўмитаси ва Украина Маданият вазирлиги ҳузуридаги Туризмни ривожлантириш давлат агентлиги ўртасида видеоконференция ўтказилди.
Онлайн мулоқот доирасида томонлар COVID-19 пандемиясининг туризм соҳасига таъсирини юмшатиш бўйича ўзаро тажриба алмашди ва халқаро сайёҳлик қатновларини тиклаш бўйича устувор чора-тадбирларни муҳокама қилди.
Онлайн мулоқот якунига кўра, томонлар Ўзбекистон ва Украина ўртасида сайёҳлик оқимини тиклаш ҳамда туристик маҳсулотларни тарғиб қилишга қаратилган қўшма ҳаракатлар дастурини ишлаб чиқишга келишиб олди.
Аввалроқ Қозоғистоннинг SCAT авиакомпанияси Ақтау—Урганч—Ақтау йўналишида доимий парвозларни амалга ошириши ҳақида хабар берилганди.
Изоҳ (0)