Россиянинг «Газпром» компанияси 2020 йилнинг бошидан июнь ойининг охиригача Ўзбекистондан табиий газ сотиб олмади, деб хабар бермоқда Spot «Интерфакс»га таяниб.
Компания маълумотига кўра, «Газпром» Ўзбекистондан 2019 йилда 7,6 миллиард кубометр (шу жумладан, биринчи ярим йилликда 3,3 миллиард кубометр), 2018 йилда 6,7 миллиард кубометр ва 2017- йилда 7,2 миллиард кубометр газ сотиб олган.
2020 йилнинг биринчи ярмида «Газпром» Туркманистондан газ сотиб олишни кўпайтирди — 2019 йилнинг биринчи олти ойи учун 1,2 миллиард кубометрдан 1,7 миллиард кубометргача.
Аввалроқ «Лукойл» Ўзбекистонда газ қазиб олиш ҳажмини қисқартирган ва йилнинг биринчи ярмини зарар билан якунлаган эди. Февраль ойидан августгача компания газ қазиб олишни лойиҳавий қувватини 20 фоизгача қисқартирган. Бу пандемия шароити туфайли Хитойда ўзбек газига бўлган талабнинг пасайиши туфайли юз берди.
Июнь ойида Россия компаниясининг ишлаб чиқариш қуввати тахминан 40 фоизгача пасайган, август ойида эса у лойиҳаларнинг бирида ишлаб чиқариш ва газни Ўзбекистондан Хитойга экспорт қилишни бутунлай тўхтатди.
«Лукойл» ўз ҳисоботида иккинчи чоракда чет элда, асосан, ишлаб чиқариш активлари қадрсизланишидан 39 миллиард рубль зарар кўрганлигини, энг кўп зарар (36 миллиард доллар)айнан Ўзбекистонга тўғри келганлигини маълум қилган.Аввалроқ «Лукойл» Хитойда талаб камайиб кетгани сабаб Ўзбекистонда газ қазиб олишни қисқартиргани хабар берилган эди.
Изоҳ (0)