Драган Скочич: Элдор Шомуродовнинг ўйини менда яхши таассурот қолдирди

Эрон терма жамоаси бош мураббийи Драган Скочич Ўзбекистонга қарши кечган ўртоқлик ўйинидан (2:1) кейин ўз фикрлари билан ўртоқлашди.

Биринчи навбатда ҳар икки мамлакат футбол федерацияларига ҳозирги қийин вазиятда ушбу ўйинни ташкил этиб бергани учун раҳмат айтаман. Бу ўйинга футболчиларни йиғиш осон бўлмади. Албатта, маҳаллий ўйинчилар билан бу борада муаммо бўлгани йўқ, аммо Европадан бир амаллаб етиб келган футболчиларга ҳам раҳмат айтмоқчиман.

Бизда ушбу учрашувга тайёргарлик кўриш учун жуда қисқа вақт бўлди: жамоа билан атиги икки бор учрашиб битта машғулот ўтказдим. Биринчи бўлимда икки хил тактикада ўйнашимизга тўғри келди, кучли ва кучсиз томонларимизни кўриб олдик. Иккинчи бўлимда ўйинимизни ўзгартирдик, 6 нафар футболчи захирадан майдонга тушди. Мен йигитлардан чиройли ўйин кутгандим ва шундай бўлди ҳам. Ғалабадан хурсандман. Ўзбекистон терма жамоаси ҳам яхши ўйин кўрсатди, бизга кўп босим ўтказди.

Аввало шуни айтишим керак, биз ҳимоявий ўйин кўрсатмадик. Жамоам имкон қадар ҳужум уюштирди. Бир нечта вазиятларни юзага келтирдик. Шунингдек, рақиб ҳам яхши ўйнаганини айтиб ўтишим керак. Лекин ўйинимизни ҳимоявий дея олмайман. Эътибор беринг, 4-1-4-1 тактикаси бўйича ҳаракат қилдик, бу ҳужумкор услуб дегани. Қанотлардан ҳам кўп ҳужум уюштирдик. Мен одатда жамоам гол уриши учун қулай тактикани белгилайман. Ўртоқлик ўйинларида шуни синаб кўрмасангиз, яна қачон синайсиз? Расмий ўйинларда 4-2-3-1 тактикасини маъқул кўраман.

Бир неча кун олдин Шомуродов Италия клубига ўтганини биламан. Унинг ўйини менда яхши таассурот қолдирди. Сардор Азмун ҳам Европанинг энг кучли клубларидан бири — «Зенит»да ўйнаяпти. Ҳар иккаласи яхши ҳужумчи.

Драган Скочич, Эрон терма жамоаси бош мураббийи