«Реал» дарвозабони Тибо Куртуа жароҳат сабаб Бельгия терма жамоаси йиғинини тарк этди.
АS нашрининг хабар қилишича, 28 ёшли футболчи бел мушакларини шикастлаб олган. Терма жамоа мураббийлар штаби футболчини клуб тасарруфига қўйиб юборган.
Шу тариқа Куртуа Кот-д’Ивуар (8 октябрь) билан ўтадиган ўртоқлик учрашуви, Миллатлар Лигаси доирасидаги Англия (11 октябрь) ва Исландияга (14 октябрь) қарши учрашувларни ўтказиб юборади.
Бельгиялик дарвозабон «Реал»нинг «Кадис»га қарши кечадиган 18 октябрь кунги учрашувига қадар тикланиши кутилмоқда.
Агар Тибо клубининг ўйинига қадар сафга қайта олмаса «Реал» жиддий муаммога дуч келиши мумкин. Сабаби жамоанинг иккинчи дарвозабони Андрей Лунинда коронавирус аниқланган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)