Кам таъминланган оилаларга ижтимоий нафақалар қандай тартибда бекор қилинади?

Кам таъминланган оилаларга моддий ёрдам ва ижтимоий нафақаларни тўлаш қачон ва қандай ҳолларда тўхтатилади каби саволларга Адлия вазирлиги ахборот хизмати раҳбари Севара Ўринбоева АОКАда бўлиб ўтган матбуот анжуманида жавоб берди.

«Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисида»ги низомнинг 38-бандида болали оилаларга нафақа, бола парвариши бўйича нафақа ва моддий ёрдам тўлаш қачон ва қандай ҳолларда тўхтатилиши белгилаб қўйилган. Унга кўра:

• тўловнинг қонун ҳужжатларида белгиланган муддати тугаган;
• болалар болали оилаларга нафақа ва бола парвариши бўйича нафақа олиш ҳуқуқини истисно этувчи ёшга тўлган;
• бола парвариши бўйича нафақа олувчи она ишга чиққан;
• доимий яшаш жойи ўзгарган;
• фуқароларнинг ўзини ўзи бошқариш органи томонидан оиланинг ушбу тўловларга эҳтиёжмандлиги йўқлигидан далолат берувчи ҳолатлар аниқланган;
• фуқаролар йиғинининг (комиссиянинг) тегишли тўловларни тайинлаш тўғрисидаги қарорига таъсир кўрсатган бузилган ва ишончсиз маълумотлар аниқланган

Шунингдек, пахта йиғим-терими мавсумий иш бўлганлиги учун пахта теримида топилган моддий маблағ асос қилинган ҳолда ижтимоий нафақа ва моддий ёрдам пуллари тўхтатиб қўйилмайди.

Бундан ташқари, нафақа ва моддий ёрдам ҳар бир оила аъзосининг ўртача ойлик жами даромад миқдори  меҳнатга ҳақ тўлашнинг энг кам миқдорининг 52,7 фоизидан (358 007 сўмдан) ортиқ бўлмаган оилаларга берилади. Бунда 14 ёшгача болалари бўлган оилаларга нафақа:

• 1 нафар болали оилага – 131 минг сўм;
• 2 нафар болали оилага - 217 000 минг сўм;
• 3 ва ундан ортиқ болали оилага - 304 минг сўм;
• 2 ёшга тўлгунга қадар бола парвариши бўйича нафақа - 434 минг сўм;
• кам таъминланган оилаларга моддий ёрдам - 326 минг сўмдан 653 минг сўмгача берилади.