Kam ta’minlangan oilalarga ijtimoiy nafaqalar qanday tartibda bekor qilinadi?

Kam ta’minlangan oilalarga moddiy yordam va ijtimoiy nafaqalarni to‘lash qachon va qanday hollarda to‘xtatiladi kabi savollarga Adliya vazirligi axborot xizmati rahbari Sevara O‘rinboyeva AOKAda bo‘lib o‘tgan matbuot anjumanida javob berdi.

“Kam ta’minlangan oilalarga ijtimoiy nafaqalar va moddiy yordam tayinlash va to‘lash tartibi to‘g‘risida”gi nizomning 38-bandida bolali oilalarga nafaqa, bola parvarishi bo‘yicha nafaqa va moddiy yordam to‘lash qachon va qanday hollarda to‘xtatilishi belgilab qo‘yilgan. Unga ko‘ra:

• to‘lovning qonun hujjatlarida belgilangan muddati tugagan;
• bolalar bolali oilalarga nafaqa va bola parvarishi bo‘yicha nafaqa olish huquqini istisno etuvchi yoshga to‘lgan;
• bola parvarishi bo‘yicha nafaqa oluvchi ona ishga chiqqan;
• doimiy yashash joyi o‘zgargan;
• fuqarolarning o‘zini o‘zi boshqarish organi tomonidan oilaning ushbu to‘lovlarga ehtiyojmandligi yo‘qligidan dalolat beruvchi holatlar aniqlangan;
• fuqarolar yig‘inining (komissiyaning) tegishli to‘lovlarni tayinlash to‘g‘risidagi qaroriga ta’sir ko‘rsatgan buzilgan va ishonchsiz ma’lumotlar aniqlangan

Shuningdek, paxta yig‘im-terimi mavsumiy ish bo‘lganligi uchun paxta terimida topilgan moddiy mablag‘ asos qilingan holda ijtimoiy nafaqa va moddiy yordam pullari to‘xtatib qo‘yilmaydi.

Bundan tashqari, nafaqa va moddiy yordam har bir oila a’zosining o‘rtacha oylik jami daromad miqdori  mehnatga haq to‘lashning eng kam miqdorining 52,7 foizidan (358 007 so‘mdan) ortiq bo‘lmagan oilalarga beriladi. Bunda 14 yoshgacha bolalari bo‘lgan oilalarga nafaqa:

• 1 nafar bolali oilaga – 131 ming so‘m;
• 2 nafar bolali oilaga - 217 000 ming so‘m;
• 3 va undan ortiq bolali oilaga - 304 ming so‘m;
• 2 yoshga to‘lgunga qadar bola parvarishi bo‘yicha nafaqa - 434 ming so‘m;
• kam ta’minlangan oilalarga moddiy yordam - 326 ming so‘mdan 653 ming so‘mgacha beriladi.