Шимолий Корея раҳбари Ким Чен Ин коронавирусга чалинган АҚШ президенти Дональд Трамп ва унинг рафиқаси Меланияга мактуб юборди. Унда Ким Чен Ин Америка раҳбари тезроқ тузалишини тилаган. Хабар матни 2 октябрь, жума куни Корея марказий телеграф агентлиги томонидан эълон қилинди, дея хабар бермоқда «Корреспондент».
«Менга сиз ва турмуш ўртоғингизда коронавирус аниқлангани тўғрисида кутилмаган хабар келди. Сиз ва сизнинг оилангизга ҳамдардлик мактубини йўлламоқдаман. Сиз ва турмуш ўртоғингизга чин қалбимдан тезроқ соғайишингизни тилаб қоламан», – дейилади хабарда.
Шунингдек, Ким Чен Ин Трамп, албатта, соғайиб кетишига ишонч билдирди.
Трампнинг касаллиги АҚШ президентлигига номзод Жо Байденнинг штаб-квартирасига ҳам таъсир кўрсатди. Улар коронавирус билан касалланган Америка раҳбарига қарши ҳужумларни тўхтатишга қарор қилишди. Бу ҳақда штабдаги манбасига асосланиб Reuters ва Associated Press хабар бермоқда.«Байден штаб-квартираси вакиллари бўлажак президент сайловларида собиқ вице-президентнинг асосий рақиби бўлган Трампни танқид қилиш тўғрисида реклама беришдан вақтинча бош тортмоқда», дейилади хабарда.
Трамп 2 октябрь куни уни қўллаб-қувватлаган одамларга мурожаат қилди ва уларга миннатдорчилик билдирди. Давлат раҳбари видеомурожаатни ўзининг Twitter’даги саҳифасида жойлаштирган.
— Donald J. Trump (@realDonaldTrump) October 2, 2020
«Мен барчага беқиёс қўллаб-қувватлаши учун миннатдорчилик билдирмоқчиман. Мен Уолтер Рид касалхонасига кетяпман. Менинг аҳволим яхши, лекин биз ҳамма нарса шундай кетаётганига ишонч ҳосил қилишимиз керак», – дейди Трамп.
Шунингдек, у COVID-19 ташхиси қўйилган рафиқаси Мелания ўзини яхши ҳис қилаётганини таъкидлади.
Мавзуга доир: Шавкат Мирзиёев коронавирусга чалинган Дональд Трампга мактуб йўллаб, унинг тез фурсатда соғайишини тилади
Маълум қилинишича, АҚШ президенти ёши (у 74 ёшда) ва вазни (2019 йилда 110 килограмм эди) туфайли хавф гуруҳига киради.
Трампни даволовчи шифокорининг айтишича, COVID-19 ташхиси тасдиқлангандан сўнг Америка президенти Regeneron препаратининг саккиз граммли дозасини олган. Бундан ташқари, Трамп цинк, D витамини, «Фамотидин», «Мелатонин» ва «Аспирин» қабул қилган.
Аввалроқ Дональд Трампнинг коронавирусга чалингани сабабли дунё фонд бозорларида беқарорликлар юзага келиши мумкинлиги ҳақида хабар берилганди.
Изоҳ (0)