АҚШ президенти Дональд Трампнинг COVID-19 билан касаллангани ҳақидаги хабар дунё фонд бозорларида тебранишларни юзага келтириши мумкин, деб ёзмоқда CNBC.
Financial Times’нинг қўшимча қилишича, Трамп ўзининг касалланганлиги ҳақида хабар берганидан кейин АҚШнинг S&P 500 биржаси индекси 0,4 фоизга пасайган, Nasdaq Composite’да эса Apple, Tesla ва Microsoft акцияларининг пасайиши сабабли 1,5 фоизлик тушиш кузатилган.
Талабнинг тикланиши борасидаги хавотирлар сабабли пасайган нефть нархлари 2 октябрь куни янада тушган. Шимолий денгизнинг Brent нефти 2,8 фоизга арзонлашиб, бир баррелнинг нархи 39,78 долларни ташкил қилган.
АҚШ бозоридаги кўрсаткичлардан ташқари, 2 октябрь куни Австралия ва Япониядаги биржа индексларида ҳам пасайиш кузатилган.
Thorpe Abbotts Capital компанияси раҳбари Жефф Хенриксеннинг айтишича, Трамп ҳақидаги хабар «COVID-19’ни инвесторлар диққат марказига қайтаради», шунингдек, 2020 йилнинг ноябрида бўлиб ўтадиган АҚШ президентлик сайлови атрофидаги мавжуд сиёсий ноаниқликларни кучайтиради.
Дональд Трамп коронавирусга чалингани ҳақида 2 октябрь куни маълум қилди. У сайловолди тадбирларидаги иштирокини 10 кунга тўхтатди. Унинг Жо Байден билан кейинги дебати 15 октябрь куни бўлиб ўтиши керак.
Изоҳ (0)