Shimoliy Koreya rahbari Kim Chen In koronavirusga chalingan AQSh prezidenti Donald Tramp va uning rafiqasi Melaniyaga maktub yubordi. Unda Kim Chen In Amerika rahbari tezroq tuzalishini tilagan. Xabar matni 2-oktabr, juma kuni Koreya markaziy telegraf agentligi tomonidan e’lon qilindi, deya xabar bermoqda “Korrespondent”.
“Menga siz va turmush o‘rtog‘ingizda koronavirus aniqlangani to‘g‘risida kutilmagan xabar keldi. Siz va sizning oilangizga hamdardlik maktubini yo‘llamoqdaman. Siz va turmush o‘rtog‘ingizga chin qalbimdan tezroq sog‘ayishingizni tilab qolaman”, – deyiladi xabarda.
Shuningdek, Kim Chen In Tramp, albatta, sog‘ayib ketishiga ishonch bildirdi.
Trampning kasalligi AQSh prezidentligiga nomzod Jo Baydenning shtab-kvartirasiga ham ta’sir ko‘rsatdi. Ular koronavirus bilan kasallangan Amerika rahbariga qarshi hujumlarni to‘xtatishga qaror qilishdi. Bu haqda shtabdagi manbasiga asoslanib Reuters va Associated Press xabar bermoqda.“Bayden shtab-kvartirasi vakillari bo‘lajak prezident saylovlarida sobiq vitse-prezidentning asosiy raqibi bo‘lgan Trampni tanqid qilish to‘g‘risida reklama berishdan vaqtincha bosh tortmoqda”, deyiladi xabarda.
Tramp 2-oktabr kuni uni qo‘llab-quvvatlagan odamlarga murojaat qildi va ularga minnatdorchilik bildirdi. Davlat rahbari videomurojaatni o‘zining Twitter’dagi sahifasida joylashtirgan.
— Donald J. Trump (@realDonaldTrump) October 2, 2020
“Men barchaga beqiyos qo‘llab-quvvatlashi uchun minnatdorchilik bildirmoqchiman. Men Uolter Rid kasalxonasiga ketyapman. Mening ahvolim yaxshi, lekin biz hamma narsa shunday ketayotganiga ishonch hosil qilishimiz kerak”, – deydi Tramp.
Shuningdek, u COVID-19 tashxisi qo‘yilgan rafiqasi Melaniya o‘zini yaxshi his qilayotganini ta’kidladi.
Mavzuga doir: Shavkat Mirziyoyev koronavirusga chalingan Donald Trampga maktub yo‘llab, uning tez fursatda sog‘ayishini tiladi
Ma’lum qilinishicha, AQSh prezidenti yoshi (u 74 yoshda) va vazni (2019-yilda 110 kilogramm edi) tufayli xavf guruhiga kiradi.
Trampni davolovchi shifokorining aytishicha, COVID-19 tashxisi tasdiqlangandan so‘ng Amerika prezidenti Regeneron preparatining sakkiz grammli dozasini olgan. Bundan tashqari, Tramp sink, D vitamini, “Famotidin”, “Melatonin” va “Aspirin” qabul qilgan.
Avvalroq Donald Trampning koronavirusga chalingani sababli dunyo fond bozorlarida beqarorliklar yuzaga kelishi mumkinligi haqida xabar berilgandi.
Izoh (0)