Тожикистоннинг Ўзбекистон билан чегараларни очиш масаласи коронавирус тарқалишига қарши кураш бўйича республика штаби қарорига мувофиқ қабул қилинади. Бу ҳақда Тожикистон ТИВга таяниб Asia-Plus хабар берган.
«Куни кеча 1 октябрь куни Ўзбекистондан чегараларни очиш юзасидан расмий хабарномани қабул қилиб олдик. Мазкур хат республика штабига юборилган. Айни вақтда мазкур масала кўриб чиқиш жараёнида», – дейилади Тожикистон ТИВ маълумотида.
Вазирликнинг қайд этишича, пандемия туфайли республика штаби чегараларни очиш масаласини кўриб чиқади, чекловлар ва бошқа шартларни белгилаб беради.
Эслатиб ўтамиз, Ўзбекистон 1 октябрдан бошлаб барча давлатлар, жумладан Тожикистон учун чегарларини очган: бунда мамлакатлар чекловларга қараб гуруҳларга ажратилган.
Asia-Plus’нинг ёзишича, «Дўстий» ўтиш пунктида 1 октябрдан бошлаб бир неча киши чегарадан ўтишга муваффақ бўлган.
«Ўзбекистон ҳудудига бир неча киши оилавий сабабларга кўра фавқулодда ўтказилган, Тожикистонга эса мамлакатдаги олий таълим муассасаларида ўқийдиган талабаларнинг автобуси киритилган», – дейилади чегара пунктининг хабарида.
Қайд этилишича мазкур ҳолатларнинг барчасида зарур эҳтиёт чоралари амалга оширилган.
Тожикистонни Ўзбекистон билан боғлаб турувчи бошқа бир ўтиш пунктида 11 октябрдан бошлаб, мамлакатда Президентлик сайловлари ўтганидан кейин чегаралар очилиши маълум қилинган.
«Озодлик» нашрининг маълум қилишича, «Пахтаобод» ва «Фотиҳобод» пунктларида тожикистонлик чегарачилар Ўзбекистонда рафиқаси ёки турмуш ўртоғи яшайдиганлар қўшни давлат ҳудудига ўтиши мумкинлигини билдирган.
Шунингдек, улар Ўзбекистондаги тожикистонликлар ватанга қайтиши мумкинлигини ҳам тасдиқлаган. Ҳайдовчилари Тожикистон фуқаролари бўлган Россия давлат рақамига эга юк машиналарининг ҳам мамлакатга киришига рухсат берилган.
Изоҳ (0)