Ижтимоий тармоқларда йўл ҳаракати қоидаларини бузган ҳайдовчининг TikTok аккаунти скриншот ва видеоёзувлари тарқалди.

Фото: Тошкент шаҳар ИИББ

Тошкент шаҳар ИИББнинг маълум қилинишича, Tracker русумли автомобиль ҳайдовчиси (давлат рақами 01 К 550 ХА) – 20 ёшли Исмоилов Дилшод Усмон ўғли Чилонзор тумани Бунёдкор кўчасида авариявий ҳолатни юзага келтиргани сабабли (видеога туширилган ҳолат) Ўзбекистон Маъмурий жавобгарлик тўғрисидаги кодексининг 128-5 моддаси (транспорт воситалари ҳайдовчиларининг халақит бериши ёки авария ҳолатини юзага келтириш) иккинчи қисмига мувофиқ жаримага тортилди. Унинг автомобили жарима майдончасига жойлаштирилди.

Йўл ҳаракати хавфсизлиги бош бошқармасининг маълумотларига кўра, мазкур ҳайдовчи 2019 йилда 8 та ҳуқуқбузарлик содир этганлиги қайд этилган (транспорт воситалари ҳайдовчиларининг белгиланган ҳаракат тезлигини ошириб юбориши), 2020 йилда ҳам у томондан содир этилган ҳуқуқбузарликлар сони 8 тани ташкил этмоқда (худди ўша модда бўйича, шулардан тўрттасининг жаримаси тўланган).

Фото: Тошкент шаҳар ИИББ

Ижтимоий тармоқларда жаримага тортилган ҳайдовчи Тошкент вилояти Олмалиқ шаҳри ҳокими – Усмон Исмоилович Ҳакимовнинг ўғли экани маълум қилинди. Видеода у автомобилни камида 150 километр соат тезликда бошқарганини кўриш мумкин.

Аввалроқ Олмалиқ ҳокими ўғлининг бу ҳаракатлари юзасидан изоҳ бериб чиққанди. Унга кўра, Олмалиқ шаҳар ҳокими Усмон Раҳимов видеодаги ҳайдовчи унинг фарзанди эканини тасдиқлаган, аммо тармоққа жойланган бу видеоларга «анча вақт бўлган»ини айтган.

«Ўшанда у бунинг учун жаримага тортилганди. Тезликни оширгани учун мен унга рулга ўтиришни тақиқладим. У 3-4 ойдан буён автомобиль бошқармаяпти», – деганди ҳоким.

Шунингдек, у ижтимоий тармоқларида қоида бузгани учун тузилган баённомалар суратини жойлаб борган.

Фото: Telegram / Эффект Макаренко