Olmaliq hokimining Toshkentda soatiga 150 km tezlikda mashina haydagan o‘g‘li jarimaga tortildi. U ikki yilda 16 marta qoida buzgan

Ijtimoiy tarmoqlarda yo‘l harakati qoidalarini buzgan haydovchining TikTok akkaunti skrinshot va videoyozuvlari tarqaldi.

Toshkent shahar IIBBning ma’lum qilinishicha, Tracker rusumli avtomobil haydovchisi (davlat raqami 01 K 550 XA) – 20 yoshli Ismoilov Dilshod Usmon o‘g‘li Chilonzor tumani Bunyodkor ko‘chasida avariyaviy holatni yuzaga keltirgani sababli (videoga tushirilgan holat) O‘zbekiston Ma’muriy javobgarlik to‘g‘risidagi kodeksining 128-5 moddasi (transport vositalari haydovchilarining xalaqit berishi yoki avariya holatini yuzaga keltirish) ikkinchi qismiga muvofiq jarimaga tortildi. Uning avtomobili jarima maydonchasiga joylashtirildi.

Yo‘l harakati xavfsizligi bosh boshqarmasining ma’lumotlariga ko‘ra, mazkur haydovchi 2019-yilda 8 ta huquqbuzarlik sodir etganligi qayd etilgan (transport vositalari haydovchilarining belgilangan harakat tezligini oshirib yuborishi), 2020-yilda ham u tomondan sodir etilgan huquqbuzarliklar soni 8 tani tashkil etmoqda (xuddi o‘sha modda bo‘yicha, shulardan to‘rttasining jarimasi to‘langan).

Ijtimoiy tarmoqlarda jarimaga tortilgan haydovchi Toshkent viloyati Olmaliq shahri hokimi – Usmon Ismoilovich Hakimovning o‘g‘li ekani ma’lum qilindi. Videoda u avtomobilni kamida 150 kilometr soat tezlikda boshqarganini ko‘rish mumkin.

Avvalroq Olmaliq hokimi o‘g‘lining bu harakatlari yuzasidan izoh berib chiqqandi. Unga ko‘ra, Olmaliq shahar hokimi Usmon Rahimov videodagi haydovchi uning farzandi ekanini tasdiqlagan, ammo tarmoqqa joylangan bu videolarga “ancha vaqt bo‘lgan”ini aytgan.

“O‘shanda u buning uchun jarimaga tortilgandi. Tezlikni oshirgani uchun men unga rulga o‘tirishni taqiqladim. U 3-4 oydan buyon avtomobil boshqarmayapti”, – degandi hokim.

Shuningdek, u ijtimoiy tarmoqlarida qoida buzgani uchun tuzilgan bayonnomalar suratini joylab borgan.