Футбол бўйича Ўзбекистон терма жамоаси ноябрь ойидаги ФИФА кунларида БАА мамлакатида йиғин ўтказади, дея хабар қилмоқда ЎФА.

Фото: ЎФА

Мазкур йиғин доирасида иккита терма жамоа билан ўртоқлик учрашуви ўтказиш режалаштирилган. Вадим Абрамов қўл остидаги терма жамоа 12 ноябрь куни Сурия терма жамоасига қарши ўйнайди. 17 ноябрь куни эса Ироқ терма жамоасига қарши баҳс олиб боради.

Аввалроқ Ўзбекистон терма жамоаси октябрь ойидаги ФИФА кунларида ҳам ўртоқлик ўйинларида иштирок этиши хабар қилинганди. 8 октябрь куни «Пахтакор» стадионида Эронга қарши ўйиндан сўнг, 12 октябрда Дубайда БАА билан ўртоқлик учрашуви ташкиллаштирилади.

Маълумот учун, коронавирус пандемияси сабаб ЖЧ—2022 ва Осиё Кубоги—2023 мусобақалари саралаш баҳсларининг 2020 йилдаги учрашувлари қолдирилганди.

Аввалроқ Профессионал футбол Лигаси октябрь ва ноябрь ойларидаги ФИФА кунларида расмий ўйинлар йўқлиги сабаб Суперлига ўйинларини давом эттирилиши сўраб ЎФАга мурожаат қилгани, шундан кейин ПФЛ ва терма жамоа вакиллари ўртасида учрашув ташкил этилгани маълум бўлганди. Бундан маълум бўладики, ЎФА ФИФА кунларидаги танаффус вақтини бекор қилмаган ва пандемия сабаб узилишларга учраган Суперлига мазкур вақтлар давомида вақтинча танаффус олади.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!