O‘zbekiston terma jamoasi oktabr va noyabr oylarida 4 ta o‘rtoqlik uchrashuvi o‘tkazadi

Futbol bo‘yicha O‘zbekiston terma jamoasi noyabr oyidagi FIFA kunlarida BAA mamlakatida yig‘in o‘tkazadi, deya xabar qilmoqda O‘FA.

Mazkur yig‘in doirasida ikkita terma jamoa bilan o‘rtoqlik uchrashuvi o‘tkazish rejalashtirilgan. Vadim Abramov qo‘l ostidagi terma jamoa 12-noyabr kuni Suriya terma jamoasiga qarshi o‘ynaydi. 17-noyabr kuni esa Iroq terma jamoasiga qarshi bahs olib boradi.

Avvalroq O‘zbekiston terma jamoasi oktabr oyidagi FIFA kunlarida ham o‘rtoqlik o‘yinlarida ishtirok etishi xabar qilingandi. 8-oktabr kuni “Paxtakor” stadionida Eronga qarshi o‘yindan so‘ng, 12-oktabrda Dubayda BAA bilan o‘rtoqlik uchrashuvi tashkillashtiriladi.

Ma’lumot uchun, koronavirus pandemiyasi sabab JCh—2022 va Osiyo Kubogi—2023 musobaqalari saralash bahslarining 2020-yildagi uchrashuvlari qoldirilgandi.

Avvalroq Professional futbol Ligasi oktabr va noyabr oylaridagi FIFA kunlarida rasmiy o‘yinlar yo‘qligi sabab Superliga o‘yinlarini davom ettirilishi so‘rab O‘FAga murojaat qilgani, shundan keyin PFL va terma jamoa vakillari o‘rtasida uchrashuv tashkil etilgani ma’lum bo‘lgandi. Bundan ma’lum bo‘ladiki, O‘FA FIFA kunlaridagi tanaffus vaqtini bekor qilmagan va pandemiya sabab uzilishlarga uchragan Superliga mazkur vaqtlar davomida vaqtincha tanaffus oladi.