Арманистон қуролли кучлари 27 сентябрь куни Тоғли Қорабоғда қайта бошланган жанговар ҳаракатлар оқибатида 550 нафардан ортиқ ўлдирилган ва яраланган ҳарбий хизматчини йўқотди. Meduza’нинг ёзишича, бу ҳақда «Интерфакс»га Озарбайжон Мудофаа вазирлиги хабар берган.
Шунингдек, вазирлик тўқнашувлар давомида Озарбайжон армияси 22 та танк ва бошқа оғир бронтехника, 15 та зенит-ракета мажмуаси, 18 та учувчисиз учиш қурилмаси, 8 та артиллерия қурилмаси ҳамда учта ўқ-дори омборини йўқ қилганини қўшимча қилган.
Арманистон ҳалок бўлганлар ҳақидаги маълумотни рад этган. Тан олинмаган Тоғли Қорабоғ республикаси вакилларининг айтишича, жанглар давомида Арманистон томонидан 31 киши ҳалок бўлган.
Арманистон Мудофаа вазирлиги вакили Арцрун Ованнисян ўз навбатида Қорабоғдаги жангда Озарбайжон армияси бир кунда қарийб 200 нафар ҳарбий хизматчи, шунингдек, 30 га яқин танк ва 20 та учувчисиз учиш қурилмасини йўқотганини маълум қилган. Аввалроқ Бокуда Арманистон томон ўққа тутиши оқибатида 5 киши ҳалок бўлгани, 19 киши яралангани маълум қилинган.
Тоғли Қорабоғда Озарбайжон ва Арманистон ўртасида ҳарбий низо 27 сентябрь куни қайтадан бошланди. Ҳар икки томон ҳам бир-бирини иғвогарона хатти-ҳаракатлар ва вазиятни кескинлаштиришда айбламоқда. Можаро кескинлашгани туфайли ҳар иккала мамлакатда ҳарбий ҳолат эълон қилинган.
Арманистон мудофаа вазирлиги матбуот котиби Шушан Степаняннинг айтишича, жанглар турли шиддатда кечаси билан давом этган. Эрталаб Озарбайжон армияси артиллерия ва зирҳли техника ёрдамида ҳужум операцияларини давом эттирган.
Мавзуга доир:
- Тоғли Қорабоғда яна жанг. Озарбайжон бир неча қишлоқ босиб олинганини маълум қилди, Арманистон эса ҳарбий ҳолат ва умуммиллий сафарбарлик эълон қилди
- Арманистон бош вазири жаҳон ҳамжамиятидан Туркиянинг Қорабоғ ишига аралашувига йўл қўймасликни сўради
- Ўзбекистон ТИВ Озарбайжон ҳамда Арманистон ўртасидаги вазият кескинлашувига муносабат билдирди
Изоҳ (0)