Америкалик олимлар Британиянинг AstraZeneca фармацевтика компанияси ва Оксфорд университети ҳамкорлигида яратилган коронавирусга қарши вакцина синовларида иштирок этувчиларда аниқланган ножўя таъсирлари тўғрисидаги ҳисоботларида тафовут борлигини аниқлади. Бу ҳақда CNN’га таяниб, «РБК» хабар берди.
Сентябрь ойида AstraZeneca вакцина хавфсизлигини мустақил равишда баҳолаш учун ўз препарати клиник синовини иккинчи марта тўхтатганди. Бу вакцина синовида иштирок этаётган кўнгиллиларнинг бирида ноодатий симптомлар аниқланганидан кейин юз берган.
CNN’нинг ёзишича, AstraZeneca ОАВга тадқиқот биринчи марта июль ойида тўхтаганида иштирокчида паришонхотирлик бўлганини маълум қилган. Бироқ Оксфорд университети сайтида «тушунарсиз неврологик симптомлар» ҳақида айтилган.
Сентябрь ойида эса синовлар яна тўхтатиб қўйилган. Фармацевтика компанияси иккинчи кўнгиллида «тушунарсиз касаллик» бўлганини очиқ эълон қилган. аммо AstraZeneca’нинг ички ҳужжатларида бу ҳолат кўндаланг миелит (кам учрайдиган неврологик касаллик) деб қайд этилган.
Йел тиббиёт мактаби доктори Харлан Крамхолцнинг айтишича, Оксфорд университети ва фармацевтика компанияси баёнотлари бир-биридан катта фарқ қилади. «Уларнинг маълумотлари изчил бўлиши керак, изчил бўлмаса, бу саволлар туғдиради», — деган Крамхолц.
Шифокорнинг ҳамкасблари билан бирга таъкидлашича, препарат хавфсизлигини ўрганишда неврологик касалликлар табиати аҳамиятга эга. «Агар кўнгиллиларнинг иккисида ўхшаш ҳолат бўлган бўлса, унда муаммо вакцинада бўлиши мумкин. Агар ҳолатлар ҳар хил бўлган бўлса, у ҳолда юзага келган симптомлар вакцина таъсири натижасида эмас, тасодиф бўлиши мумкин», — дейилади хабарда.
Орегон соғлиқни сақлаш ва фан университети иммунологи Марк Слифканинг қайд этишича, Оксфорд университети маълумотларига кўра, синовларнинг иккала иштирокчиси ҳам асаб касалликларидан азият чеккан ва бу табиийки, саволлар туғдириши керак.
Вакцина синови иштирокчисидаги паришонхотирлик билан боғлиқ июль ойидаги ҳолат мустақил ҳайъат томонидан тасодифий ва вакцинага билан боғлиқ бўлмаган деб топилган. AstraZeneca’да синовларнинг сентябрь ойидаги тўхтатилиши кўнгиллиларнинг бирида кўндаланг миелит аломатлари пайдо бўлганидан кейин дори сифатини текшириш билан изоҳлаган. Аммо аниқ ташхис аниқланмаган.
Орадан бир неча кун ўтиб компания Буюк Британиядаги синовларни қайта бошлаган. Буюк Британия дори-дармонлар ва соғлиқни сақлаш маҳсулотлари сифатини назорат қилиш бошқармаси (МҲРА) вакцинани хавфсиз деб топган.
Эслатиб ўтамиз, айни пайтда коронавирусга қарши фақат битта вакцина — Россиядаги Гамалея номидаги марказнинг «Спутник V» вакцинаси рўйхатдан ўтган. У август ойида клиник синовлар тугашидан олдин рўйхатдан ўтказилган.
Изоҳ (0)