Armaniston va Ozarbayjon Qorabog‘da yuzlab harbiylar halok bo‘lganini ma’lum qildi. Janglar qaytadan boshlandi

Armaniston qurolli kuchlari 27-sentabr kuni Tog‘li Qorabog‘da qayta boshlangan jangovar harakatlar oqibatida 550 nafardan ortiq o‘ldirilgan va yaralangan harbiy xizmatchini yo‘qotdi. Meduza’ning yozishicha, bu haqda “Interfaks”ga Ozarbayjon Mudofaa vazirligi xabar bergan.

Shuningdek, vazirlik to‘qnashuvlar davomida Ozarbayjon armiyasi 22 ta tank va boshqa og‘ir brontexnika, 15 ta zenit-raketa majmuasi, 18 ta uchuvchisiz uchish qurilmasi, 8 ta artilleriya qurilmasi hamda uchta o‘q-dori omborini yo‘q qilganini qo‘shimcha qilgan.

Armaniston halok bo‘lganlar haqidagi ma’lumotni rad etgan. Tan olinmagan Tog‘li Qorabog‘ respublikasi vakillarining aytishicha, janglar davomida Armaniston tomonidan 31 kishi halok bo‘lgan.

Armaniston Mudofaa vazirligi vakili Artsrun Ovannisyan o‘z navbatida Qorabog‘dagi jangda Ozarbayjon armiyasi bir kunda qariyb 200 nafar harbiy xizmatchi, shuningdek, 30 ga yaqin tank va 20 ta uchuvchisiz uchish qurilmasini yo‘qotganini ma’lum qilgan. Avvalroq Bokuda Armaniston tomon o‘qqa tutishi oqibatida 5 kishi halok bo‘lgani, 19 kishi yaralangani ma’lum qilingan.

Tog‘li Qorabog‘da Ozarbayjon va Armaniston o‘rtasida harbiy nizo 27-sentabr kuni qaytadan boshlandi. Har ikki tomon ham bir-birini ig‘vogarona xatti-harakatlar va vaziyatni keskinlashtirishda ayblamoqda. Mojaro keskinlashgani tufayli har ikkala mamlakatda harbiy holat e’lon qilingan.

Armaniston mudofaa vazirligi matbuot kotibi Shushan Stepanyanning aytishicha, janglar turli shiddatda kechasi bilan davom etgan. Ertalab Ozarbayjon armiyasi artilleriya va zirhli texnika yordamida hujum operatsiyalarini davom ettirgan.