АҚШ президенти Дональд Трамп 10 йилдан бери федерал даромад солиғини тўламайди, деб хабар бермоқда The New York Times’га таяниб «РБК».
The New York Times Трампнинг 20 йилдан ортиқ солиқ декларациялари, шу жумладан, унинг бизнес империясини ташкил этувчи юзлаб компаниялар тўғрисидаги маълумотларни ўрганиб чиққан.
«Сўнгги 10 йил ичида у ҳеч қандай даромад солиғи тўламаган. Аввалроқ у даромаддан кўра кўпроқ зарар кўраётганини айтганди», – дейилади нашр хабарида.
Трамп 2016 йилда фақатгина 750 доллар даромад солиғини тўлаган. 2017 йилда ҳам у тўлаган солиқ миқдори айни шунчани ташкил этган.
Нашрнинг таъкидлашича, 2018 йилда президент «Ўқувчи» реалити-шоусидаги улушидан ва ўз исмидан фойдаланиш ҳуқуқи учун қарийб 427 миллион доллар ишлаб олган. Шу билан бирга, иккита офис биносига муваффақиятли сармоя киритгани сабаб 176,5 миллион доллар даромад қилган. Фақатгина ушбу даромадлар учун Трамп 100 миллион доллардан кўпроқ солиқ тўлаши керак эди, деб қайд этади The New York Times.
Трамп NYT нашридаги маълумотларни ёлғон деб атади.
«Буларнинг барчаси сохта хабарлар. Аслида мен солиқ тўлайман», – деди президент. Трампнинг таъкидлашича, ҳозирда унинг солиқ декларациялари қайта кўриб чиқилмоқда.
«Агар менинг 108 саҳифалик декларациямни кўриб чиқсангиз, кўпроқ нарсани билиб оласиз. Мен буни жамоатчиликка етказишни кутмоқдаман. Одамлар эса ҳақиқатан ҳам ҳайратда қолади», – деди Трамп.
The New York Times аввалроқ ҳам Трампни солиқларни тўлашдан бўйин товлашда айблаган эди. 2019 йил май ойида нашр 1985 йилдан 1994 йилгача унинг бизнеси 1,17 миллиард доллар зарар кўрган, деб ёзган эди. Бу зарар Трампга саккиз йил давомида даромад солиғини тўламасликка ёрдам берган.
Изоҳ (0)