Украина президенти Владимир Зеленский Харьков яқинидаги авиаҳалокатда ҳалок бўлганлар хотирасига 26 сентябрни мотам куни деб эълон қилиш тўғрисидаги фармонни имзолади, дея хабар бермоқда «Корреспондент».
«Кеча даҳшатли фожиа – Чугуев яқинидаги Ан-26 самолётининг қулаши натижасида Украина 26 нафар муносиб ўғлини йўқотди. 25 киши воқеа жойида вафот этди, бири касалхонада ҳаётдан кўз юмди. Бир киши даволанмоқда. Биз унинг тезроқ соғайиб кетиши учун дуо қиламиз.
Биз ҳали бутун ҳаёти олдинда бўлган ёш курсантлар ва тажрибали ҳарбийларни йўқотдик. Бу йўқотиш дардини ифода этадиган сўзларни топиш қийин. Уларнинг ота-оналари, турмуш ўртоқлари ва фарзандларига тасалли берадиган гапларни топиш қийин.
Бугун бутун мамлакат ўз оилалари билан мотамда бўлади. Мен 26 сентябрни мотам куни деб эълон қилиш тўғрисида фармон имзоладим», – деб ёзган Зеленский Telegram каналида.
Унинг таъкидлашича, давлат жароҳат олган курсантга даволаниши ва яқинларини йўқотганларга товон пули тўлаши керак.
«Украина ўз қаҳрамонларини унутмайди. Мен ушбу самолёт ҳалокатининг сабабларини зудлик билан аниқлашни ҳамда тергов объектив ва холис ўтказилишини талаб қиламан», – дея хулоса қилди Зеленский.
ОАВ президентнинг ҳалокатга учраган жойга аллақачон етиб келганини хабар қилмоқда. Унинг сўзларига кўра, бош вазир Денис Шмигаль авиаҳалокат туфайли ҳукуматнинг фавқулодда йиғилишини тайёрламоқда.
Аввалроқ Ан-26 ҳалокатида омон қолганлардан бири касалхонада вафот этгани ҳақида хабар қилинди. Шифокор тирик қолган иккинчи курсантнинг ҳолати яхши эканини маълум қилган.
Самолётнинг «қора қути»си ҳали топилмади.
Президент барча Ан-26 самолётлари парвозини тўхтатди
Маълум қилинишича, Зеленский Ан-26 рейсларини тўхтатиб туриш ҳақида буйруқ берди. Бу ҳақда 26 сентябрь куни Украина президенти девони раҳбарининг ўринбосари Олег Татаров мамлакат телеканаллари эфирида маълум қилди.Унга кўра, Харьков вилоятидаги авиаҳалокат сабаблари аниқланмагунча, барча Ан-26 самолётларининг парвозлари тўхтатилади.
«Президент фожиа сабаблари аниқланмагунча шу каби самолётлар иштирокидаги ҳар қандай парвозларни тўхтатиш тўғрисида буйруқ берди. Мудофаа вазири ва бош штаб бошлиғи буйруқни бажаришни бошлади. Менимча, нима содир бўлганлиги холисона аниқланмагунча бундай рейслар бўлмайди», – деди Татаров.
Ўз навбатида бош вазир Денис Шмигаль мудофаа вазири Андрей Таранга тергов давомида ўқув парвозларини амалга оширганларни ишдан четлатишни буюрди.
«Мудофаа вазирига терговнинг холислигини таъминлашни буюраман. Тергов пайтида ўқув парвозлари учун масъул шахслар ишдан бўшатилади», – деди Шмигаль.
У тегишли буйруқни 26 сентябрь куни Вазирлар маҳкамасининг фавқулодда йиғилишида берди.
Изоҳ (0)