Туркманистон Халқ Маслаҳати 25 сентябрь куни мамлакат Конституциясига ўзгартириш киритиш масаласини кўриб чиқди ва ўзгаришларни маъқуллади. Бу ҳақда «Хроника Туркменистана» хабар берди.
Туркманистон президенти Гурбангули Бердимуҳамедов раислигида онлайн форматда ўтган Халқ Маслаҳатининг йиғилишида ҳукумат аъзолари, парламент раиси ва депутатлари, вазирликлар ва партиялар раҳбарлари, вилоятлар ва шаҳарлар ҳокимлари, ҳудудлардаги халқ маслаҳатлари аъзолари ва жамоатчилик вакиллари иштирок этган. Йиғилишнинг асосий мавзуси мамлакат Конституциясига таклиф қилинган ўзгартириш бўлган.
Халқ Мажлиси иштирокчилари «Туркманистон Конституциясига ўзгартириш ва қўшимчалар киритиш тўғрисида»ги конституцион қонун лойиҳасини бир овоздан маъқуллаган. Шундан сўнг Туркманистон президенти қонун лойиҳаси кўриб чиқиш учун парламентга таклиф қилинишини билдирган.
«Хроника Туркменистана»нинг ёзишича, Халқ Мажлиси йиғилишининг танаффуси вақтида мамлакат парламенти — Мажлиснинг навбатдаги йиғилиши бўлиб ўтган. Мажлис депутатлари «Туркманистон Конституциясига ўзгартириш ва қўшимчалар киритиш тўғрисида»ги конституцион қонун лойиҳасини бир овоздан маъқуллаган ва уни қабул қилган. Шундан сўнг қонун президент Гурбангули Бердимуҳамедов томонидан имзоланган.
Туркманистон Конституциясига киритилган ўзгартиришга кўра, мамлакатда икки палатали парламент шакллантирилади. Парламент Туркманистон Миллий Кенгаши деб номланади ва икки палата — Халқ Маслаҳати (юқори) ва Мажлисдан (қуйи) иборат бўлади.
Қабул қилинган қонун 2021 йил 1 январдан кучга киради. Шу муносабат билан Халқ Маслаҳатининг ваколати тугатилади. Қонунга кўра, Миллий Кенгашнинг палаталари аъзоларининг биринчи сайловлари муддати президент томонидан белгиланади. Бердимуҳамедов янги шакллантириладиган парламент учун сайловни 2021 йилнинг биринчи чорагида ўтказишни таклиф қилди.
Аввалроқ Конституцияга киритиладиган барча ўзгартириш ва қўшимчалар 2020 йилнинг июль ойигача муҳокама учун эълон қилиниши билдирилган. Бироқ бу иш амалга ошмаган.
Гурбангули Бердимуҳамедов 19 август куни Конституцион комиссия аъзолари билан йиғилиш ўтказган. Комиссия аъзолари мамлакатнинг янги Конституцияси лойиҳаси устидаги ишлар якунланганини маълум қилган.
Маълум бўлишича, янги Конституцияда Миллий Кенгашнинг ваколатлари белгилаб берилган. Мамлакатнинг барча собиқ президентлари парламентнинг юқори палатасидан ўз жойига эга бўлади.
Изоҳ (0)