Украина коронавирус билан боғлиқ вазият бўйича «қизил» ва «яшил» давлатлар рўйхатини янгилади. Ўзбекистон «яшил» давлатлар қаторидан ўрин олди
Украина Соғлиқни сақлаш вазирлиги коронавирус билан боғлиқ эпидемиологик вазиятдан келиб чиқиб, 25 сентябрь ҳолатига кўра «қизил» ва «яшил» мамлакатлар рўйхатини янгилади. Бу ҳақда «Korrespondent.net» хабар берди.
Рўйхатда Жаҳон соғлиқни сақлаш ташкилотига аъзо бўлган 194 та давлат бўйича маълумотлар берилган. Унда COVID-19 билан касалланиш бўйича ҳар бир мамлакатда 100 минг кишига тўғри келадиган фаол ҳолатлар ҳақида маълумот берилган.
Украинада 19 сентябрь ҳолатига кўра, бу кўрсаткич ҳар 100 минг аҳолига 109,5 та касалланиш ҳолатини ташкил қилган.
«Қизил» давлатлар қаторидан 25 сентябрь ҳолатига кўра 35 та мамлакат ўрин олган, жумладан, Исроил, Испания, Черногория, Франция, Чехия, Молдова, Венгрия.
«Яшил» мамлакатлар қаторига эса Руминия, Албания, Беларусь, Польша, Туркия, Греция, Миср ва бошқа давлатлар киритилган. Ўзбекистон ҳам «яшил» давлатлар қаторидан ўрин олган. Рўйхатда Ўзбекистон ҳар 100 минг аҳолига тўғри келаётган 25,8 та ҳолат билан Болгария ва Польша орасида жойлашган.
Яна 15 та давлат бўйича COVID-19 билан касалланиш ҳолатлари ҳақида маълумот мавжуд эмас.
Аввалроқ Украина президенти Владимир Зеленский мамлакатда COVID-19 коронавирус инфекцияси билан касалланишнинг иккинчи тўлқини кетаётганини маълум қилганди.
