Франция пойтахти Париж шаҳрида 25 сентябрь куни пичоқ билан қуролланган шахс шаҳарнинг 11-округидаги Никол Аппер кўчасида одамларга ҳужум уюштирди. Терроризмга қарши кураш прокуратураси мазкур ҳодиса билан шуғулланмоқда. Бу ҳақда «Интерфакс» хабар берди.
Маълум қилинишича, тергов «жиноий террористик ташкилот томонидан террористик фитна уюштирилиши муносабати билан қотилликка уриниш» моддаси асосида бошланган. Ҳужум Charlie Hebdo журналининг собиқ биноси яқинида амалга оширилган.
Франция бош вазири Жан Кастекс Парижда одамларга ҳужум уюштирилгани сабабли вазиятни ўрганиш ва унинг ривожини кузатиш учун Ички ишлар вазирлигининг инқироз марказига йўл олаётганини маълум қилган.
Маълум бўлишича, ҳужум оқибатида икки киши жароҳат олган, улардан бирининг жароҳати оғир, бироқ унинг ҳаёти хавф остида эмас. Жабрланганларнинг иккаласи ҳам аввал Charlie Hebdo журнали таҳририяти фаолият олиб борган бинода жойлашган Premieres Lignes ахборот агентлигининг ходимлари ҳисобланади. Улардан бири эркак, иккинчи эса аёл киши.
Le Figaro газетасининг хабар беришича, ҳужумда гумон қилинаётган 33 ёшли шахсдан ташқари, ҳуқуқни муҳофаза қилувчи органлар ходимлари қон излари асосида ташқи кўриниши ҳинду-покистонлик бўлган яна бир шахсни қўлга олган. Кейинроқ мазкур 18 ёшли йигит ўзининг покистонлик эканлигини ва ҳужумга алоқадорлигини тан олган.
Эслатиб ўтамиз, Франция пойтахти Париж шаҳрида жойлашган Charlie Hebdo сатира газетаси биносида 2015 йилнинг 7 январь куни номаълум шахслар Калашников автоматлари билан ўт очиб, теракт амалга оширганди. Муҳаммад (с.а.в) карикатураси сабабли амалга оширилган бу ҳужум бутун дунёда кенг қамровли акс садо берганди.
Изоҳ (0)