АҚШ ва Хитой олимлари 2000 йилдан 2016 йилга қадар Хитойда 30,8 миллион киши ҳавонинг ифлосланиши оқибатида вафот этганини аниқлади. Бунинг учун тадқиқотчилар NASA суратларини ўрганиб, Хитойнинг турли қисмларидаги атмосферанинг ифлосланиш даражасини тадқиқ этган. Бу борадаги тадқиқот натижалари Proceedings of the National Academy of Scienceс журналида чоп этилди, деб хабар беради Hi-Tech.Mail.ru.
Фото: Balkan Green Energy News
Тадқиқотчилар диаметри 2,5 микрометрдан кам бўлган PM2.5 зарраларининг концентрациясини ўлчаган. Шунингдек, мутахассислар ердаги станциялар томонидан ҳавога чиқариладиган газларга оид маълумотлар мониторинги, завод ва автомобиль йўлларининг жойлашган харитасини ўрганган. Бевақт ўлим даражасини аниқаш учун олимлар ўлим ҳолатларининг атмосфера ифлосланиш даражасига боғлиқ кўрсаткичларидан фойдаланган.
Ҳисоб-китобларга кўра, 2006 йилдан 2016 йилга қадар Хитойда юқори PM2.5 концентрацияси оқибатида ҳар йили 1,5—2 миллион одам вафот этган. Бундан ташқари, майда зарраларнинг юқори концентрацияси соғлиқ билан боғлиқ кўплаб муаммоларни, сурункали касалликларни юзага келтириши мумкин.
Олинган натижалар Германияда жойлашган Макс Планк номидаги кимё институти олимлари томонидан ҳавонинг глобал ифлосланиши инсон ҳаётини ўртача уч йилга қисқартираётгани ва ҳар йили 8,8 миллион киши бевақт ўлим топаётгани тўғрисидаги хулосасига мос келмоқда.
Аввалроқ Ер атмосферасининг ифлосланиш харитаси таҳлили сайёрадаги аҳолининг деярли ярми таркиби чангнинг юқори концентрацияси ва аэрозолларга эга ўта ифлос ҳаводан нафас олишини кўрсатган эди.
