Мутахассислар COVID-19 билан касалланганлар соғайгандан кейин бошқаларга хавф туғдириши мумкинлиги ҳақида маълумотга эга эмас. «РБК»нинг хабар беришича, бу ҳақда «Роспотребнадзор» марказий илмий-тадқиқот эпидемиология институти клиник ва аналитик ишлар бўйича директор ўринбосари Наталья Пшеничная маълум қилган.

«Коронавирус инфекциясидан соғайиб чиққан одам бошқалар учун хавфли бўлиши мумкинлиги тўғрисида маълумотлар жаҳон илм-фанида ҳозирча йўқ», — деган у.

Пшеничнаянинг сўзларига кўра, соғайган киши бир мунча вақт вирус ажратиши мумкин, аммо у тирик эмас ва бошқа организмда кўпая олмайди. Бундай ҳолатларда коронавирусга топширилган таҳлил натижаларининг ижобий чиқиши тест тизимининг инфекция генетик материалига реакциясини кўрсатади. Мутахассис бу борада қўшимча тадқиқотлар ўтказиш зарурлигини таъкидлаган.

Хабарда айтилишича, 15 сентябрь куни «Роспотребнадзор» раҳбари Анна Попова COVID-19 билан касалланиб, даволаниб чиққан одам атрофдагилар учун яна 90 кун давомида хавф туғдириши мумкинлигини маълум қилган.

Бу вирус билан касалланган одам организми тузалганидан кейин ҳам маълум вақт SARS-CoV-2 вирусини чиқаришда давом этиши билан изоҳланади.

Попованинг айтишича, бунда вирус ташувчида ҳеч қандай аломатлар кузатилмаслиги мумкин. «Одамда ҳеч қандай симптомлар йўқ, қони ва барча кўрсаткичлари яхши, лекин бурун бўшлиғидан вирус ажралиб чиқади», — деган у.